Presidenti rus Vladimir Putin u ka ofruar Shteteve të Bashkuara mundësinë e blerjes së tokës ruse me mierale të rralla, duke përfshirë depozitat e vendosura në zonat e Ukrainës lindore të cilat janë pushtuar gjatë luftës nga Rusia.
“Ne jemi të gatshëm të bashkëpunojmë me partnerët tanë, përfshirë amerikanët”, tha Putin të hënën, duke lënë të hapur mundësinë e rifillimit të eksporteve të aluminit rus në Shtetet e Bashkuara.
Në të njëjtën kohë, ai theksoi se Rusia ka shumë më tepër burime natyrore të këtij lloji sesa Ukraina.
Presidenti rus tha se marrëveshjet e mundshme për shfrytëzimin e tokave të rralla mund të shtrihen edhe në depozitat e vendosura në territoret ukrainase që kanë rënë nën kontrollin e Moskës pas tre vitesh konflikt.
Më herët të hënën, presidenti amerikan Donald Trump u tha gazetarëve në Uashington se “marrëveshjet e mëdha ekonomike me Rusinë” ishin të pashmangshme. Menjëherë pas deklaratave të Trump, Putin thirri një takim urgjent dhe të paparalajmëruar me ministra dhe këshilltarë ekonomikë, me fokus në metalet e rralla.
Ndërkaq, dje Donald Trump, teksa ishte ulur përkrah Emmanuel Macron në Shtëpinë e Bardhë, iu referua tokave të rralla të Ukrainës, duke folur për nevojën për të arritur një marrëveshje me Kievin për mineralet dhe tokat e pasura me to, në mënyrë që – siç tha ai – SHBA të rikuperojë një pjesë të burimeve të mëdha ekonomike që ia ka dhënë Kievit gjatë luftës në formë ndihmash.
Sipas të dhënave nga Shërbimi Gjeologjik i SHBA (USGS), Rusia mban rezervat e pesta më të mëdha të tokës së rrallë në botë, pas Kinës, Brazilit, Indisë dhe Australisë.
