Moska ende nuk ka marrë një vendim përfundimtar nëse Presidenti rus Vladimir Putin do të marrë pjesë në samitin e G20, që do të zhvillohet në Miami në dhjetor.
Zëdhënësi i Kremlinit, Dmitry Peskov, tha se çështja e pjesëmarrjes së presidentit rus mbetet e hapur.
“Nuk e dimë ende nëse do të shkojmë në Miami”, deklaroi Peskov, sipas agjencisë ruse të lajmeve Interfax.
Më herët, këshilltari i politikës së jashtme të Kremlinit, Yuri Ushakov, tha gjithashtu se mundësia e pjesëmarrjes së Putinit në samit nuk është diskutuar ende në Moskë.
Në prill, Kremlini kishte njoftuar se Putin do të merrte pjesë në samitin e G20, pasi Presidenti i SHBA-së, Donald Trump, kishte deklaruar se prania e tij në takimin e nivelit të lartë do të ishte e dobishme.
Ndërkohë, Peskov komentoi edhe deklaratat e Presidentit ukrainas Volodymyr Zelensky lidhur me mundësinë e një takimi me Putinin gjatë samitit.
Zelensky ka thënë se mund të udhëtojë në Miami nëse Putin merr pjesë në samit dhe se mund të kërkojë një takim me presidentin rus.
Por Kremlini përsëriti qëndrimin e tij se, nëse presidenti ukrainas dëshiron të takohet me homologun e tij rus, ai duhet të udhëtojë në Moskë.
