Zyra e ish-kancelarit gjerman Gerhard Schröder ka refuzuar të komentojë deklaratat e presidentit rus Vladimir Putin, i cili e përmendi atë si një ndërmjetës të mundshëm europian në negociatat për përfundimin e luftës në Ukrainë.
Në përgjigje të një kërkese nga agjencia gjermane e lajmeve DPA, zyra e Schröderit deklaroi se nuk do të jepte asnjë koment për këtë çështje.
Ndërkohë, agjenci ndërkombëtare të lajmeve, duke cituar burime anonime nga qeveria gjermane, raportojnë se propozimi i Putinit “nuk është i besueshëm”, pasi Rusia nuk ka ndryshuar kushtet e saj për përfundimin e luftës. Sipas këtyre burimeve, një tregues i parë i besueshmërisë do të ishte zgjatja e armëpushimit 3-ditor të shpallur nga Moska gjatë kësaj fundjave.
Propozimi i Putinit u bë gjatë një konference për shtyp pas paradës së Ditës së Fitores kundër nazizmit, ku ai deklaroi se lufta në Ukrainë “po i afrohet fundit” dhe la të kuptohej se ajo mund të përfundojë së shpejti. Ai shtoi se do të preferonte Schröder-in si ndërmjetës të Bashkimit Europian në bisedimet me Ukrainën.
Po ashtu, Putin u shpreh i gatshëm për bisedime të drejtpërdrejta me presidentin ukrainas Volodymyr Zelensky, por tha se një takim i tillë mund të zhvillohej vetëm në Moskë.
Nga ana tjetër, Zelensky e ka përjashtuar kategorikisht mundësinë e një vizite në kryeqytetin rus. Putin shtoi se bisedimet në një vend të tretë do të ishin të mundura vetëm nëse paraprakisht arrihet një marrëveshje e besueshme paqeje.
Nga ana tjetër, Presidenti i Këshillit Europian, António Costa, ka deklaruar se Bashkimi Europian është i gatshëm të zhvillojë bisedime të ndara me Rusinë dhe Ukrainën “kur të vijë momenti i duhur”.
Marrëdhënia mes Vladimir Putin dhe Gerhard Schröder ka qenë e mirë prej vitesh. Ish-kancelari gjerman është kritikuar vazhdimisht në Gjermani dhe në Europë për lidhjet e tij me Kremlinin dhe kompanitë ruse.
Së fundmi, Schröder ka deklaruar në një artikull për “Berliner Zeitung” se lufta e Rusisë në Ukrainë përbën shkelje të së drejtës ndërkombëtare, por ka shtuar se është kundër “demonizimit të Rusisë si një armik i përhershëm”.
