Ushtarët rus janë vetëm 10 kilometra larg. Ky është alarmi që kanë ngritur forcat ushtarake të Ukrainës. Në prononcimet e ndryshme për Assosiated Press, komandantët ukrainas shprehen të shqetësuar se Rusia është shumë afër arritjes së qëllimit kryesor, marrjes së plotë të Donetskut.
Komandantët ukrainas shprehen të shqetësuar se, ushtarë të rinj ukrainas refuzojnë të qëllojnë kundër armikut. Të tjerët, sipas komandantëve dhe bashkëluftëtarëve, citon AP, luftojnë për të mbledhur armë ose për të koordinuar lëvizjet luftarake. Disa madje janë larguar nga pozicionet e tyre, duke braktisur fushën e betejës. Ndërkohë që Ukraina vazhdon me inkursionin e saj në rajonin e Kurskut të Rusisë, trupat e saj ende po humbasin terren të çmuar përgjatë frontit lindor të vendit – një dështim i zymtë për të cilin komandantët ushtarakë ukrainas fajësojnë pjesërisht rekrutët e trajnuar dobët të marrë nga një lëvizja e fundit e mobilizimit, shkruan A2 CNN.
“Disa njerëz nuk duan të qëllojnë. Ata e shohin armikun në pozicionin e qitjes në llogore, por nuk hapin zjarr. … Kjo është arsyeja pse njerëzit tanë po vdesin”, tha një komandant batalioni në Brigadën e 47-të të Ukrainës, për AP.
Komandantët thonë se rekrutët kanë kontribuar në një varg humbjesh territoriale që i mundësuan ushtrisë ruse të përparonte, duke përfshirë qytetin e Pokrovsk, një qendër kritike logjistike. Nëse bie, disfata do të rrezikonte mbrojtjen e Ukrainës. Trupave të reja u mungon edhe një nivel minimal trajnimi, thanë komandantët dhe ushtarët nga katër brigada që mbrojnë zonën e Pokrovsk. Të frustruar me cilësinë e rekrutëve të rinj të dërguar në vijën e parë nga qendrat territoriale të rekrutimit, komandantët tani po kërkojnë të kryejnë lëvizjet e tyre të mobilizimit për të kontrolluar dhe trajnuar më mirë luftëtarët e rinj, thanë komandantë dhe ushtarë të shumtë, shkruan A2 CNN.
Zelenski shprehet optimist dhe bën të ditur se ka marrë një tjetër vendbanim në rajonin rus të Kursk. Por ndërkohë, Zelenskyy kërkon më shumë ndihma konkrete dhe financime ushtarake për ti bërë ballë forcave ruse.
