Në muajt e parë pas pushtimit të Shqipërisë nga Italia fashiste, mbyllja e gjithë lojrave të fatit dhe ndalimi i kumarit në çdo ambient, ishte një prej urdhrave të bujshëm të mëkëmbësit të Viktor Emanuelit në Shqipëri, Françesko Jakomoni.
Por zbatimi i këtij urdhri dukej se qe i vështirë. Një varg shkresash të vjeshtës së ‘39-ës, dëshmojnë se sfida për t’i mbyllur të gjithë lojrat e fatit ishte e madhe. Një varg lokalesh e restorantesh ishin mbyllur e mbaheshin të bllokuara pasi i kishin kapur klientët e tyre në flagrancë duke luajtur kumar.
Por kjo luftë ishte shtrirë edhe më gjerë. As në shtëpi nuk mund të organizoheshin lojra të tilla. Një avokat në Durrës i cili mblidhte njerëz në shtëpinë e tij për të luajtur kumar, kishte rënë në sy të informatorëve, të cilët ksihin lajmëruar në Ministrinë e Brendshme këtë shkelje të rëndë.
Pas këtij informacioni, vetë ministri Maliq Bushati urdhëronte Prefekturën e Durrësit ta shihte këtë çështje. Pas hetimeve kishte rezultuar se lajmi ishte i vërtetë. Ja çfarë thonë ekzaktësisht këto dy dokumente:
Dokumenti i parë
Mbretnija Shqiptare, Ministrija P.Mbrendshme
Zyra sekrete
Nr.674
Tiranë, 7/XI/1939
Prefekturës Durrës
Kemi informata se shpesh herë, mbremane, shumë tregtarë mblidhen në shtëpinë e av.Sulo Bogdos ku lozin lodra fati.
Ata më kryesorët janë: Skënder Pojani, Lazer Dovana, Spiro Spiro, si dhe kryetari i Gjyqit Thanas Meksi. Megjithëse kjo ministri nuk beson se në atë shtëpi dhe ata persona të lozin kumar. Lutemi hetoni dhe nëse rezulton e vërtetë. Të këshillohen personat e përmendur si dhe ata që mund të frekuentojnë atë lokal me qëllim luajtjeje, që të rezervohen e të mos u japin shkak raportimeve.
Ministri Maliq Bushati
Dokumenti i dytë
Mbretnija Shqiptare, Prefektura e Durrësit
Nr.241
Durrës 19/XI/939
P.T.
Ministrisë së Punëve të Mbrendshme
Zyra sekrete
Tiranë
Përgjigje shkresës nr.674 dt.7 të këtij muaji.
Asht e vërtetë se në shtëpinë e Av.Sulo Bogdos në Durrës, shumë veta mblidhen e lozin lodra fati.
Sa për kryetarin e Gjyqit z.Thanas Meksi, mbas hetimeve të sigurta rezulton se nuk e frekuenton atë shtëpi.
Sul Bogdo u këshillue që të mos sjelli në shtëpi njerëz me qëllime lodre./tesheshi /a.ç
