Pushimet verore janë drejt fundit. Kjo ka rikthyer edhe një herë fluksin e emigrantëve shqiptarë që rikthehen në vendet ku punojnë pas pushimeve në atdhe. Vetëm në 2 ditët e fundit, janë plot 10.541 udhëtarë të cilët kanë shfrytëzuar tragetet për t’u nisur drejt porteve të Italisë.
Numri i udhëtarëve që kanë mbërritur ndërkohë në Durrës ka qenë shumë më i vogël, vetëm 2553. Nga të dhënat e Autoritetit Portual (APD), mësohet se numri i udhëtarëve që janë larguar këto ditë me tragete ka qenë 4 herë më i lartë se sa i udhëtarëve që mbërrijnë në portin më të madh të vendit. Sipas parashikimeve, në fundjavë pritet të nisen masivisht me tragete mijra udhëtarë shqiptarë dhe të huaj, që kaluan pushimet pranë familjeve, të afërmve apo miqve të tyre në qytete të ndryshme të vendit tonë. Të mërkurën dhe të enjten në portin e Durrësit mbërritën 2553 udhëtarë me 552 autovetura, ndërsa 10.541 të tjerë me 2292 autovetura janë nisur drejt porteve të Ankonës dhe Barit (Itali). Në 48 orët e fundit tragetet kanë kryer 7 lundrime drejt Durrësit dhe 8 të tjera drejt porteve italiane.
