Në Partinë Socialiste tashmë është gati drafti me ndryshimet në statutin e saj, ku në sy bie fakti se nëse fitohen zgjedhjet parlamentare, mandati i kryetarit të partisë rikonfirmohet automatikisht. Pasi është konsultuar edhe me statute të disa partive europiane, në statutin e ri do të sanksionohet parimi që mandati i kryetarit të partisë rikonfirmohet nëse partia del fituese në zgjedhjet parlamentare.
Këtë variant burime nga grupi i punës për statutin e krahasuan me një tjetër përcaktim që ka statuti aktual i PS-së, atë të dorëheqjes nëse partia humb zgjedhjet. Ky përcaktim statutor do t’u japë fund debateve që ishin ndezur në Partinë Socialiste që në shtator 2013, kur kryetarit të kësaj partie, Edi Rama, i mbaroi mandati katërvjeçar, ndërsa nuk u zhvilluan zgjedhjet e reja në PS. Socialistët sapo kishin fituar zgjedhjet parlamentare dhe ishin rikthyer në pushtet.
Vetë kreu i PS-së, Edi Rama, në disa deklarata për këtë çështje e justifikoi moszhvillimin e zgjedhjeve në parti me faktin se vendi dhe partia sapo kishin dalë nga një palë zgjedhjesh dhe po merrej me nisjen nga puna të qeverisë së re, ndërsa ishte shprehur se do të merret përvoja më e mirë e partive të majta europiane.
Drafti që është përgatitur nga grupi i punës do t’i paraqitet Asamblesë kombëtare për diskutim, e cila pritet të mblidhet brenda muajit nëntor, siç përcaktoi mbledhja e fundit e saj, ndërsa miratimi i statutit të ri do të bëhet në kongresin e janarit 2016.
Asambleja Kombëtare e Partisë Socialiste e mbledhur në mesin e muajit korrik, vendosi ngritjen e një grupi pune të përbërë me deputetë dhe ministra me përvojë në çështjet ligjore për përmirësimin e statutit të kësaj partie. Grupi i punës drejtohet nga kryetari i Komisionit parlamentar të Ligjeve, Fatmir Xhafaj, dhe në të bëjnë pjesë ministrat Damian Gjiknuri dhe Ermonela Felaj, por dhe anëtarët e Asamblesë Armando Subashi, Bashkim Fino, Ethem Ruka, Majlinda Bufi, Musa Ulqini, Namik Dokle dhe Vasilika Hysi.
Grupi i punës është mbledhur disa herë, ndërsa një tjetër ekip të rinjsh është marrë me përafrimet e modeleve të statuteve të partive europiane me statutin e PS-së. Ndryshimet e tjera në statut kanë të bëjnë me përshtatjen e tij me ndarjen e re territoriale dhe administrative, ku njësia vendore komunë nuk ekziston më.
Bashkia do të jetë njësia bazë organizative e PS-së, ku do të zgjidhet kryetari i partisë në këtë njësi. Funksionet dhe kompetencat e kryetarit të PS-së në bashki do të ndryshojnë. Ai do të jetë funksionar, me rrogë dhe nuk duhet të jetë i punësuar në administratën publike.
Gjithashtu, bashkia do të ketë një asamble të zgjeruar, ndërsa kompetencat e saj do të ndryshojnë për t’i dhënë më shumë hapësirë dhe fuqi propozuese, por dhe kontrolluese të qeverisjes, kur partia është në pushtet. Të zgjedhurit e PS-së në çdo ish-komunë apo ish-bashki përbërëse e bashkisë së madhe do të përbëjnë dhe kryesinë e bashkisë./ Panorama
