Komisioni Qendror i Zgjedhjeve, në bashkëpunim me Drejtorinë e Përgjithshme të Gjendjes Civile, ka publikuar që nga fillimi i këtij viti ekstraktin e listës kombëtare të zgjedhësve në versionin e saj elektronik, në kuadër të zgjedhjeve parlamentare të 18 qershorit.
Në faqen e re të hapur shpjegohen procedurat që duhen ndjekur për të kryer një kërkim korrekt, ku mjafton të shkruhet emri, atësia dhe mbiemri i votuesit për t’u shfaqur të dhënat e kërkuara.
Nëse me këto tre të dhëna nuk arrihet të merret rezultat, atëherë mund të provohet edhe me kërkimin e avancuar, në të cilin shtohen detaje që mund të përdoren për kërkimin, si viti i lindjes dhe njësia e qeverisjes vendore.
Rezultati i shfaqur përfshin disa të dhëna si datëlindja, adresa e qendrës së votimit, njësia e qeverisjes vendore si dhe kodi shifror, ku ky i fundit është një element i rëndësishëm në procesin e votimit.
