Këshilli i Ministrave miratoi sot një sërë vendimesh të rëndësishme. Kështu, u miratua mënyra e organizimit dhe funksionimit të Qendrës Kombëtare të Transfuzionit të Gjakut dhe nivelet e shërbimit të transfuzionit në institucionet shëndetësore. Qeveria vendosi miratimin e marrëveshjes së rinovuar, ndërmjet Këshillit të Ministrave të Republikës së Shqipërisë dhe shoqërisë “Microsoft Corporation”, për projektin e partneritetit strategjik në fushën e teknologjisë së informacionit.
Qeveria vendosi miratimin e marrëveshjes ndërmjet Këshillit të Ministrave të Republikës së Shqipërisë dhe qeverisë së Shtetit të Izraelit, për bashkëpunim në fushat e shëndetit e mjekësisë. Qeveria vendosi miratimin e marrëveshjes së bashkëpunimit ndërmjet Republikës së Shqipërisë dhe Urdhrit Sovran Ushtarak Spitalor të Shën Gjonit të Jeruzalemit të Rhodes dhe Maltës.
Qeveria vendosi hapjen e Konsullatës së Përgjithshme të Republikës së Shqipërisë në Mynih, në Republikën Federale të Gjermanisë. Qeveria vendosi miratimin e marrëveshjes ndërmjet Këshillit të Ministrave të Republikës së Shqipërisë dhe qeverisë së Republikës Popullore të Kinës, për akordimin e grantit ekonomiko-teknik.
Qeveria gjithashtu vendosi sot Krijimin e Agjencisë Kombëtare të Ujësjellës- Kanalizimeve. Qeveria mori vendim për përdorimin dhe kontrollin e fondit operativ të policisë ushtarake në Forcat e Armatosura të Republikës së Shqipërisë.
