Një 40-vjeçar është vënë në pranga nga policia e Tiranës, pasi dyshohet si autor i vjedhjes së disa dyqaneve të telefonave në kryeqytet.
Në një nga videot e publikuara nga policia, autori thyen derën e xhamit të dyqanit dhe më pas futet me shpejtësi brenda për të marrë celularët.
Sipas policisë, shtetasi me iniciale B. Sh., 40 vjeç, banues në Tiranë, dyshohet si autor i disa vjedhjeve.
“Komisariati i Policisë Nr. 3, në vijim të punës për goditjen e paligjshmërive në fushën e vjedhjes së pasurisë, organizoi dhe finalizoi operacionin policor të koduar “Phone store”.
Dokumentohen me prova ligjore disa vjedhje të kryera në zona të ndryshme të Tiranës, nga një 40-vjeçar.
Sekuestrohen celularë të dyshuar të vjedhur nga autori i dyshuar.
Shërbimet e Komisariatit të Policisë Nr. 3, në vijim të punës për goditjen e paligjshmërive në fushën e vjedhjes së pronës dhe pasurisë, pas kallëzimeve të depozituara për disa raste vjedhjesh në dyqane që tregtojnë pajisje elektronike dhe celularë, kanë organizuar dhe finalizuar operacionin policor të koduar “Phone store”.
Gjazë operacionit u arrestua shtetasi B. Sh., 40 vjeç, banues në Tiranë, për veprën penale “Vjedhja”. Ky shtetas dyshohet se ka kryer disa vjedhje, në disa dyqane në zona të ndryshme të Tiranës.
Në cilësinë e provës materiale u sekuestruan celularë të dyshuar të vjedhur nga ky shtetas”, njofton policia.
/a.r
