Ministri i Brendshëm Sandër Lleshaj gjatë mbledhjen për analizën vjetore të punës së policisë në rang kombëtar u ka kërkuar drejtuesve të policisë që të ruajnë sekretin hetimor.
Urdhri i tij vjen pas daljes së pamjeve të vrasjes në Rrëshen, por edhe detajeve nga krimi në familje në Paskuqan.
Në ditët e para të këtij viti janë regjistruar disa ngjarje kriminale, vrasje në Mirditë, Mallakastër, Tropojë dhe në Paskuqan, por nga hetimet, kur ato ende nuk janë mbyllur, ka rrjedhje informacioni.
Kjo kërkesë e Lleshajt ka ardhur pas ngjarjeve të fundit, duke qenë se ka pasur rrjedhje të informacioneve.
Në takimin e djeshëm mësohet se Lleshaj u ka kërkuar vartësve, që asgjë të mos dalë në media.
“Marr shkas nga dalja në media të materialeve procedurale si në rastin e vrasjes në Rrëshen dhe vrasjes në Paskuqan ku dalin detaje të cilat jo vetëm që bëjnë sekret hetimor po skandalizojnë opinionin duke i interpretuar çdo farë personi.
Lleshaj ka kërkuar kujdes me porositë që ka dhënë, pasi në të kundërt do të ketë masa.
“Ju porosis: Asnjë komunikim me mediat për asnjë lloj argumentimi. Pasqyrimi i punës suaj do të bëhet nëpërmjet zëdhënësit të drejtorisë dhe Drejtorisë së Përgjithshme”, u është drejtuar Llesahj vartësve të tij.
“Në çdo rast që do të konstatoj do të filloj pa hezitim ecurinë e rëndë disiplinore ndaj jush. Me të njëjtin shqetësim përcilleni të vartësit tuaj këtë mesazh. Nuk dua justifikime për daljen e tyre”, ishte mesazhi i ministrit Lleshaj, në analizën vjetore të ditës së djeshme.
/a.r
