Rritet frika në Romë. Pas atentateve të Parisit dhe kërcënimeve se tani e ka radhën kryeqyteti italian, psikoza e terrorizmit ka pushtuar njerëzit. Dje dhe sot ka pasur një numër shumë të lartë të anulimeve të prenotimeve në restorantet e qendrës.
Këtë e ka bërë të ditur për agjencinë Adnkronos Alessandro Circiello, president i Federatës Italianë të Kuzhinierëve për Rajonin e Lazios.
“Kemi rreth 20 mijë anëtarë që përfshijnë kuzhinierë, pastiçierë, picierë dhe në dy ditët e fundit ka pasur anulime të panumërt në restorantet e shesheve të mëdha, që nga Piazza Navona në Campo de’ Fiori, kryesisht nga të huajt. Anulimet janë më të shumta sidomos në Romë, në restorantet në qendrën historike, por edhe në hotelet e mëdhenj”.
