Lajmi se PSG ka në plan të shesë njërin nga yjet e veta, Neymar ose Mbappe, që t’i shpëtojë ndonjë ndëshkimi nga UEFA për shkelje të rregullave të “fair play financiar”, e ka tërbuar klubin parizien, që ka reaguar shpejt dhe ashpër kundër “L’Equipe”.
Pak minuta më vonë nga botimi i këtij informacioni në faqen online të kësaj reviste sportive franceze, çka përbën edhe titullin e madh të saj në versionin print të numrit të sotëm, PSG vendosi të lëshojë një deklaratë, të titulluar: “L’Equipe, një media dezinformimi”.
Mes të tjerash, në të lexohet: “I mohojmë në mënyrën më të fuqishme këto informacione krejtësisht të gabuara dhe qesharake. Kjo është mundësia e vetme për të rikrijuar një klimë tensioni të madh në klubin tonë. PSG pyet veten edhe një herë në lidhje me ndershmërinë intelektuale të “L’Equipe” dhe motivet e fshehura të linjës së saj editoriale.
Ka shumë shembuj të trajtimit të pabalancuar dhe që kanë për qëllim vetëm të përhapin një atmosferë të dëmshme. Jemi ballafaquar me dezinformata të orkestruara nga “L’Equipe”, që nuk ndalet në përpjekjet e saj të palodhura për të minuar imazhin e PSG, klubit më popullor dhe të suksesshëm në Francë.
Në katër ditët e përgatitjes së ndeshjes, që na pret në Beograd, në Ligën e Kampionëve, PSG fton mbështetësit, tifozët, partnerët, ish-lojtarët…, që të mblidhen më shumë se kurrë rreth bluzës së kuqe dhe blu. Vlerat dhe ambiciet e këtij klubi, lojtarët do t’i mbajnë gjithmonë me krenari. Mbështetja e madhe e tifozëve në rrjetet sociale është jo vetëm për Neymar Jr, Cavani, Mbappé, por për të gjithë lojtarët tanë.
Duke pasur parasysh dezinformatat e orkestruara nga “L’Equipe”, si dhe vendosmërinë e saj për të dëmtuar imazhin e PSG, klubit më popullor dhe më të suksesshëm të Francës, riafirmojmë angazhimin tonë për të ecur përpara dhe ndërvepruar vetëm me bashkëbiseduesit që gëzojnë mirëbesim”.
/telesport/a.r
