Merkatoja ende nuk ka nisur, por klubet më të pasur nxitojnë, për të rrëmbyer lojtarët më të mirë në qarkullim. Këtë verë duket se një prej lojtarëve më të kërkuar do të jetë Paul Pogba, për të cilin Juventus-i ka nisur që tani të marrë oferta të rëndësishme dhe po tundohet.
Hapin e parë serioz e ka hedhur PSG, që ka vënë në “tavolinë” dy emra shumë cilësorë: sulmuesin Edinson Cavani dhe mesfushorin Marco Verratti, të dy lojtarë që e njohin mirë Serinë A dhe Juventus-i i dëshiron prej kohësh.
Jo vetëm kaq, por përveç dy lojtarëve, PSG shton edhe 20 milionë, që do të thotë se oferta shkon në 100 milionë në total, duke llogaritur 80 milionë vlerën e dy futbollistëve.
Tani Juve duhet të mendohet dhe të presë kundërpërgjigjen e Real Madrid-it, që gjithashtu e dëshiron patjetër mesfushorin.
Megjithatë, nuk është e thënë që klubi italian ta shesë mesfushorin e vet, pasi financiarisht është në gjendje shumë të mirë dhe në këtë moment synim kryesor ka rinovimin e sulmit, ku do të largohet Llorente dhe mund të kthehet në Argjentinë Tevez.
Në rast se kjo ndodh, Juve do të shpenzojë shumë dhe emri kryesor që synon është Dybala, argjentinasi i Palermo-s i cili ka spikatur këtë sezon.
Redaksia Online
(JavaNews.al)
