Edi Rama, në vizitën e tij në qytetin e Korçës, foli për gazifikimin, duke premtuar se brenda pak vitesh e gjithë Korça do të ngrohet me gaz, me kosto shumë më të ulët.
“Ne duhet të bëhemi vend sovran nga pikëpamja e energjisë. Ky projekt do të shtrihet edhe në qytetet e tjera.
Është e vërtetë një shenjë kuptimplotë e një miqësie të posaçme NUR, pasi kjo kompani ka kaq shumë projekte dhe kërkohet kudo. Gjetja e kohës dhe mundësia për të ardhur deri në Korçë me drejtuesin e kompanisë, që na bëri një shpjegim shterues dhe gjithashtu të tjerët, është një gjest kuptimplotë i një miqësie dhe partneriteti strategjik me një vend shumë mik.
Nga ana tjetër dua të jap një detaj shumë të rëndësishëm për mua, ky emërtim i bukur “Nur” është zgjedhur posaçërisht nga presidenti i Azerbajxhanit, dhe është ai që kujdeset posaçërisht për këtë projekt.
Kam qenë dëshmitar kur i ka thënë ministrit nga për projektin në Shqipëri: Nuk duam futime, e rëndësishme është të mos humbasim dhe të fitojmë qytetarët e atij vendi mik”, – tha Rama në fillim të fjalës së tij.
Ndërkohë, sipas ministres Belinda Balluku ky është një investim strategjik, në bashkëpunim me korporatën shtetërore azere SOCAR dhe me mbështetjen e Presidentit të Azerbajxhanit Ilham Aliev, synon ndërtimin e një rrjeti modern për shpërndarjen e gazit.
Ministrja Balluku tregoi pse Korça u zgjodh si vendnisja e projektit. Sipas saj arsyet kryesore janë niveli i lartë i disiplinës së konsumatorëve, rëndësia e qytetit si një qendër turistike dhe zhvillimi i bujqësisë në rajon.
“Korça është një konsumator model që ka treguar sukses në çdo projekt pilot, ka paguar faturat rregullisht dhe është treguar bashkëpunues. Po ashtu, është ndër zonat me bujqësinë më të zhvilluar dhe me vëllim të lartë prodhimi,” u shpreh ajo.
Balluku foli edhe përfitimet që ky projekt do të sjellë për qytetarët dhe ekonominë lokale nga përdorimi i energjisë më të pastër dhe efikase, mbrojtja e mjedisit, ulje e konsiderueshme e kostove për familjarët dhe bizneset dhe zhvillimi i qëndrueshëm ekonomik dhe urban.
