Evidentimi dhe pranimi i gabimeve ishin një nga pikat kryesore të ligjërimit të Lulzim Bashës në Kuvendin Kombëtar të PD-së por për analistin dhe politologun Afrim Krasniqi, akti i kreut demokrat ishte formal.
Krasniqi: Personalisht pashë elementë të sotëm të cilët nuk kishin arritur dot të reflektonin gabimet e të kaluarës për të krijuar një imazh pozitiv për të ardhmen dhe atë që pretendohet të thuhet në ligjërimin politik. Dy tezat kryesore që përdorën, dera është e hapur kushdo le të vijë dhe e dyta që ne jemi tashmë funksionalë për shkak se po i bëjmë gjërat publike nuk vlen në një parti politike përsa kohë nuk kanë zgjedhje në të gjitha nivelet, nuk ka rifreskim, nuk ka përgjegjësi.
Krasniqi tha se ka shumë qytetarë të pa kënaqur me qeverisjen aktuale por opozita ka një hendek të madh në këtë kategori.
Krasniqi: Është një numër i madh i qytetarëve shqiptarë të cilët janë të pa kënaqur me qeverisjen por që nuk janë afër opozitës sepse nuk shohin shpresë dhe besim dhe kjo është alternativa kryesore e një opozite. Nuk është të numërojë njerëzit që vinë në oborrin e saj, ose delegatët që i vinë me lista të përpunuara por është detyra e saj për tu bërë atraktive dhe për tu bërë e besueshme. Ky element i mungon terësisht opozitës.
Duke i krahasuar me skenat që ndodhën në forumet e PS-së në 2016, Krasniqi thekson se fishkëllimat nuk kanë vend gjatë artikulimit të zërave kritikë.
Krasniqi: Kur individë liberalë flasin dhe kritikojnë, dikush i fishkëllen nga salla dhe reagohet nga salla. Në një parti serioze jo vetëm që këto nuk ndodhin por në momentet që ndodhin merren masa dhe kthehet normaliteti dhe individë të tillë që shkelin rregullat etike dhe nuk tregojnë minimumin e kulturës politike imagjino se çfarë janë në gjendje të bëjnë nesër kur të kenë poste zyrtare.
Për Krasniqin, PD-së i mungon dukshëm sjellja e lidershipit pasi ish-drejtues dominojnë ende jetën e saj e cila ka nevojë për një garë të hapur dhe horizontale./OraNews
