Partitë e bllokut opozitar mohojnë se kanë mosmarrëveshje të brendshme, pavarësisht akuzave të rënda që i bëjnë në mes vete.
Pas dështimit të protestës të së shtunës, lideri i AAK-së, Ramush Haradinaj, pranoi publikisht se është ndier në siklet me veprimet e opozitës në Kuvendin e Kosovës muajt e fundit. Madje, duke iu referuar gazit në seanca Haradinaj ka thënë se është gjeneratë tjetër dhe se nuk merret, siç ka thënë ai, me “sporte të vogla” si Visar Ymeri.
E në anën tjetër, zyrtarë të Vetëvendosjes thonë se nuk kanë mosmarrëveshje me partinë e Ramush Haradinajt. Ata thonë se protesta e 26 marsit është shtyrë vetëm për shkak të konsolidimit të mëtutjeshëm dhe jo për shkak të ndonjë përçarjeje të brendshme.
“Protesta e paralajmëruar për 26 mars nuk u anulua, por është shtyrë, me qëllim të konsolidimit brenda opozitës së bashkuar, zgjerimit të mëtutjeshëm të këtij fronti, si dhe koordinimit dhe angazhimit të përbashkët në terren si një trup i vetëm”, i ka thënë “Zërit” Frashër Krasniqi, zëdhënës i Lëvizjes Vetëvendosje.
