Nga Ben Andoni
Të gjithë flasin për Tiranën, sesi duhet të jetë ajo, si do të duhej bërë më mirë, por asnjëra nga forcat politike nuk ka bërë të ditur sot e kësaj dite kandidatin e saj. Dhe, kur mendon se Tirana është një metropol, kupton qasjen politike ndaj problemeve reale, që i shqetëson njerëzit. Duket se Partia Socialiste e ka më të thjeshtë me kandidaturën e Erion Velisë, por edhe ajo po e lë në momentin e fundit për ta shpallur kandidaturën, paçka se gjasat më të mëdha i ka kryetari aktual, që në një farë mënyre e ka justifikuar besimin e Partisë së tij. I vetmi gabim, nëse mund të quhet kështu, ka qenë se shpesh propaganda e Velisë dhe e shpurës së tij e ka kaluar atë të paraardhësit socialist Edi Rama. Duke ditur fuqinë e imazhit që është te Edi Rama, nuk und të jetë detaj, që kalon lehtë pa u vërejtur, pa shtuar këtu dhe një fakt tjetër: Kryetari aktual i PS-së do t’i eklipson të tërë. Duket se në këtë krisje të vogël, po mundohen të këqyrin ose të përgjojnë ndonjë handikap kandidatë të ndryshëm dhe të ndërtojnë narracionin e tyre. Por, ata, ende nuk artikulojnë me zë të vendosur, sepse askush nuk ka verdikt partie pas. Gjithsesi, Opozita me përçarjen e vet, ka treguar se ka një afinitet për Erion Velinë dhe deklaratat e fundit çapraz të kryetares së LSI-së kundër PS-së, janë kthjelluar vetëm kur është folur për Velinë!!! A i trembet opozita poltronit të kryebashkiakut? Dukshëm po. Vetë, kryetari i opozitës, Basha nuk la dot një punë të mbarë në qytetin tonë dhe është aq i frikësuar nga kujtesa për menefregizmin dhe mungesën e punës gjatë mandatit të tij, sa as edhe njëherë nuk e ka përmendur seriozisht punën në Bashki apo krenarinë për një punë të tillë. Në ato pak raste që e ka përmendur duket se më shumë i është shmangur vetë dhe po aq e gjithë propaganda e tij e dobët, për ta ruajtur. Po ashtu edhe paraardhësit e vet nga PD-ja nuk është se mbahen mënd për punë të mira në qytet, për të mos thënë që u kujtohet vetëm konfuzioni dhe anarkia totale, që sollën dhe që e ndikoi zhvillimin e qytetit për vite me radhë.
Në këtë këndvështrim, që poltronin e kryebashkiakut e kanë frikë, besohet si argument pasi sot e kësaj dite mungon seriozisht një investim për një kandidaturë, duke ditur se makina përshfaqëse e Erion Velisë është realisht e madhe dhe e vështirë për ta sfiduar. Nga ana tjetër, kujtdo që do t’i duhej ta sfidonte duhet ta bënte me kohë, fillimisht duke investuar për imazhin e qytetarit të parë alternativ për qytetin tonë, mbushur gjithsesi me problematika. Por, Opozita, jo vetëm nuk po e bën, por edhe po mundohet të mbajë të fshehur deri mbase në Kuvendin e 15 Dhjetorit, figurën që do t’i përfaqësojë. Sesa të pabindur janë për këtë poltron të mjafton të dëgjosh krehjen e vazhdueshme që i bën Kryemadhi, në funksionin e LSI-së, Erion Velisë dhe po ashtu frika e PD-së për të treguar realisht vizionin e saj. Ndaj, narracioni i tyre për Bashkinë, është i mangët madje edhe kur ka qenë i artikuluar drejt mbetet i pabesueshëm prej mungesës së vendosmërisë.
Ndërkohë individë të ndryshëm kanë filluar diversionin për t’i paragjykuar zgjedhjet e tanishme lokale, me dyshimin për manipulimin, duke nxjerrë shumë elementë, fakt që të bën të besosh se edhe këto zgjedhje, nuk do mbesin pa u përfolur, duke na lënë sërish në pjesën që OSBE/ODHIR i duhet t’i tërheqë veshët politikës. Po, megjithatë pse Opozita nuk investohet realisht në këto zgjedhje? Frika duket e arsyeshme dhe me këtë t’i kupton përçarjen e madhe që ekziston mes opozitës, kaosin e ideve, larminë ideologjike… për fatin e Edi Ramës, që i sodit dhe i ysht me cinizëm në këtë kaos. (Javanews)
