Partitë Shqiptare Opozitare në Maqedoninë e Veriut bojkotuan seancën parlamentare të 28 janarit duke kundërshtuar kështu zgjedhjen e kryeministrit të parë shqiptar z. Talat Xhaferi.
Fadil Zendeli, deputet i “Lëvizjes Besa” në Maqedoninë e Veriut tha për Radio Televizionin Shqiptar se procesi i zgjedhjes së kryeministrit shqiptar, nuk konsiderohet si moment historik, por është produkt i marrëveshjes së arritur në 2016-të.
“Lindi një marrëveshje që ne këtu në Maqedoni e quajmë marrëveshja e Përzhinos. Nuk e vlerësojmë se bëhet fjalë për diçka historike, pasi nuk shohim shqiptarët si teknikë në Maqedoni, por shohim një popull politik i cili pretendon ta marrë hapësirën e vet politike. Pala maqedonase do ta shfrytëzojë në komunikim ndërkombëtar. Sa herë që do të ngremë çështje të ndryshme të karakterit teknik, ata do të thonë se shqiptarët kanë pasur kryetar kuvendi, kanë pasur kryeministër teknik dhe si mund të bisedojmë që shqiptarët kanë pasur probleme të ndryshme politike”, u shpreh Zendeli.
Me tej, Zendeli u shpreh se mospjesëmarrja e “Lëvizjes Besa” në zgjedhjen e kryeministrit shqiptar, lidhet specifikisht me Z. Xhaferi, pasi sipas tij, ky i fundit ne detyrën si kryeparlamentar i Maqedonisë së Veriut ka qenë penguesi kryesor i kandidatit të opozitës shqiptare në Komisionin Shtetëror të Zgjedhjeve.
“Kjo figurë politike që është kryeministër teknik e bllokoi procesin e zgjedhjes së anëtarit nga opozita shqiptare në Komitetin Shtetëror Zgjedhor”, tha Zendeli.
Ndër të tjera Fadil Zendeli theksoi se, as gjuha shqipe nuk është zyrtare por veç përkthehen në shqip ato dokumente që kanë të bëjnë me shqiptarët dhe se s’ka asnjë investim madhor në zonat me popullsi shqiptare.
/f.s
