Sot në një konferencë të përbashkët me ministren e Shëndetësisë, Ogerta Manastirliu, për të folur në lidhje me koronavirus, ishte edhe Raul Gonzales, drejtori i zyrës së OBSH-së në Shqipëri.
Ministrja tha se deri më tani, në vendin tonë nuk ka asnjë rast të konfirmuar me virus. Janë testuar 42 persona por të gjithë kanë rezultuar negativisht.
Ndërsa Gonzales në fjalën e tij, iu përgjigj pyetjes së shpeshtë se përse Shqipëria nuk ka asnjë rast të prekur me këtë virus.
Ai tha se kjo është ende e paqartë.
“Jo domosdoshmërisht duhet të kesh pasur kontakt me vendet e prekura nga virusi për t’u infektuar. Në Spanjë virusi shpërtheu nga njerëz që nuk kishin pasur asnjë kontakt me vendet e prekura”, tha Gonzales.
“Fatmirësisht në Shqipëri, nuk ka asnjë rast me këtë virus”, u shpreh ai.
Në fund ai bëri thirrje që mediat të jenë të kujdesshme në përcjelljen e informacionit në lidhje me këtë rast, ndërsa njerëzit të informohen në burime të sigurta. /e.s/
