Nga Artur Ajazi
Një pushtet i fituar qoftë edhe me shumicë votash (që nuk ndodh kurrë) nga PD-ja e sotme, nuk vlen fare. Kjo për faktin sepse, sërish reagimet e ardhura nga DASH, mbeten teje të ashpëra, lidhur me fatin politik të kreut të asaj partie Sali Berisha. Deri sot, kreu demokratëve “qëndrestarë”, po aludon dhe keqpërdor fitoren e Donald Trump në SHBA, duke thënë para kohe se “non-grata ime mund të rishikohet nga presidenca e re”. Por dimë gjithashtu se, deri sot nuk ka ndodhur që një president i ri, të merret me ç’ka ka vendosur paraardhësi i tij, aq më tepër me shpalljen “non-grata”, të ish-pushtetarëve të vendeve ish-komuniste, të pasuruar me forma nga më antiligjoret. Deri tani, Berisha po e pergatit partinë dhe njerëzit që i kanë mbetur në bazë, me efektin propogandistik se “rikthimi ka ndodhur kudo”. Kjo në kuptimin alogjik të fjalës se, “edhe rikthimi im në pushtet mund të ndodhë, edhe pse nuk më duan amerikanët”. Berisha e di fare mirë se, një pushtet i fituar nga një lider politik i akuzuar nga ata, për korrupsion dhe gjëra të tjera, nuk vlen. Kur nuk vlen për vende 5 fishi ynë në numër popullsie dhe sipërfaqe gjeografike, atëhere për ne nuk diskutohet. Ne jemi vend anëtar i NATO-s, po bëhemi “hazër” për tu bërë anëtarë të Bashkimit Europian, dhe kemi mbështetje dhe simpati të madhe europiane dhe amerikane. Atëhere, si mund të shpresojmë se, “Berisha do të fitojë pushtetin”, ose do të rikthehet në pushtet, kur nuk ka, 1- mbështetjen e shumicës së shqiptarëve, 2- kur partinë e ka ende të përçarë 3- kur nuk ka mbështetjen nderkombëtare, 4- kur nuk ka mbyllur akoma hesapet me organet e drejtësisë dhe 5- kur shqiptarët akoma nuk harrojnë bëmat e piramidave, 1997, 1998, Gërdecit, 21 Janarit, dhe abuzimit me pushtetin e 2005-2013. Hesapet në politikë bëhen me “hanxhiun”, dhe jo me imagjinata dhe sajesa që nuk të shpien gjëkundi. Edi Rama, i ka votat e shumicës së shqiptarëve, ka gjithashtu edhe mbështetjen e nderkombëtarëve, pa përmendur punët e mbaruara, dhe ato të nisura që kanë rritur dhe zhvilluar ekonominë, turizmin, dhe buxhetin familjar të shqiptareve. Realisht, PD-ja dhe Berisha nuk kanë fituar kurrë zgjedhje me votat e shumicës së shqiptarëve. Gjithmonë kanë patur nevojë për “një patericë”, e cila nuk ka zgjatur shumë, pasi janë prishur për “hesape të vjetra dhe të reja”. Sikur Berisha të kuptonte thelbin e kësaj fushate, mendoj se nuk do të kishte kurajon tu premtonte mbështetësve të tij se “fitorja jonë në 11 Maj 2025 është e sigurtë”. Por të mos harrojmë ama se, demokratët e 2025, nuk janë më ata të 1996 apo 2005. Janë më të “ftilluar” politikisht. Kaq të paktën Berisha e di.
