Pushimet verore zakonisht lidhen me çlodhjen dhe largimin nga ritmi i shpejtë i përditshmërisë. Megjithatë, për shumë njerëz kthimi nga pushimet shoqërohet me një ndjesi të papritur lodhjeje, sikur pushimi për të cilin kishin aq shumë nevojë të mos kishte ndodhur kurrë. Nëse ju ka ndodhur, nuk jeni të vetmit.
Mënyra se si i perceptojmë sot pushimet shpesh lë shumë pak hapësirë për çlodhje të vërtetë. Në vend që të shkëputemi, përpiqemi të shfrytëzojmë çdo minutë, të vizitojmë sa më shumë vende, të provojmë gjërat më të mira dhe, sigurisht, t’i dokumentojmë të gjitha. Rezultati? Një lodhje që mund të na shoqërojë edhe pasi jemi kthyer në shtëpi.
Për shumë njerëz, pushimet janë shndërruar në një tjetër aktivitet që duhet organizuar dhe realizuar në mënyrë perfekte. Kërkojmë plazhet më të mira, planifikojmë me detaje programin e çdo dite, rezervojmë aktivitete javë më parë dhe e mbushim udhëtimin me sa më shumë përvoja.
Kështu, në vend që ta përjetojmë eksperiencën, përfundojmë duke e organizuar dhe optimizuar vazhdimisht, pa i lënë hapësirë vetes për t’u çlodhur.
Pse disa njerëz sëmuren sapo fillojnë pushimet?
Ekziston madje një fenomen që psikologët e quajnë “leisure sickness” (sëmundja e pushimeve).
Sapo një person lë pas detyrimet profesionale dhe i lejon vetes të çlodhet, mund të fillojë të ndiejë lodhje të fortë apo edhe shqetësime fizike. Edhe pse duket kontradiktore, kjo lidhet me mënyrën se si trupi reagon ndaj stresit.
Kur qëndrojmë për një kohë të gjatë nën presion, nivelet e kortizolit mbeten të larta. Kur stresi ulet papritur, organizmi fillon të përpunojë atë që kishte “shtyrë” gjatë kohës kur ndodhej në gjendje vigjilence.
Për këtë arsye, shumë njerëz ndiejnë lodhje të madhe, kanë dhimbje koke apo edhe simptoma sëmundjeje gjatë ditëve të para të pushimeve.
Truri “e do” pushimin
Shumë prej nesh mendojnë se, për sa kohë nuk jemi duke punuar, po pushojmë. Megjithatë, kalimi i vazhdueshëm nga rrjetet sociale te lajmet, videot dhe mesazhet e mban trurin në një gjendje të vazhdueshme stimulimi.
Neuroshkencëtarët flasin për një sistem që aktivizohet kur nuk jemi duke bërë diçka specifike, i njohur si Default Mode Network.
Në ato momente kur në dukje “nuk po ndodh asgjë”, truri vazhdon të punojë në sfond. Ai përpunon përvojat, sistematizon mendimet dhe emocionet dhe lidh informacionet në mënyra që nuk i perceptojmë menjëherë.
Prandaj edhe idetë më të mira shpesh na vijnë në dush, gjatë një shëtitjeje apo ndërsa shikojmë detin.
Si të pushoni vërtet gjatë pushimeve
Filloni të çlodheni përpara se të niseni: Të fikni kompjuterin vonë në mbrëmje dhe të niseni për në aeroport mëngjesin tjetër nuk e ndihmon trupin të përshtatet. Nëse është e mundur, ulni ritmin një ose dy ditë para nisjes.
Mos e mbushni çdo ditë me aktivitete: Një program më i qetë nuk do të thotë se po humbisni përvoja. Përkundrazi, është sekreti për t’i shijuar ato vërtet.
Kaloni kohë në natyrë: Studimet tregojnë se mjediset natyrore ndihmojnë më shumë në rikuperimin psikologjik dhe njohës, krahasuar me mjediset urbane. Pamja e detit, një pyll apo një shteg i qetë mund të kenë një efekt të dobishëm për trurin.
Vendosni kufij për përdorimin e telefonit: Nuk është e nevojshme të shkëputeni plotësisht nga bota digjitale. Mjafton të krijoni momente gjatë ditës kur nuk kontrolloni mesazhet, email-et apo rrjetet sociale.
Lëreni një ditë plotësisht të lirë: Pa program, pa rezervime dhe pa një listë me atraksione për t’u vizituar. Ndonjëherë, momentet më të bukura të një udhëtimi janë pikërisht ato që nuk i planifikojmë paraprakisht.
