Pse ka marrë superxhiro opozita?

Nga Artur Ajazi

Prej 2 javësh emri i kryekëshilltarit të fushatës së Danald Trump, Cirs LaCivita, ka nisur të bëhet refreni i çdo fjalie dhe fjalimi nga drejtuesit e opozitës. Nuk hanë mëngjes, drekë dhe darkë, pa përmendur emrin e tij. Nuk ulen në kafene pa përmendur emrin e tij. Nuk hyjnë në Parlament, pa përmendur emrin e tij. Nuk shkon dot në SPAK Sali Berisha, pa dalë para mediave dhe pa përmendur emrin e tij.

Askush nga opozita, nuk ulet në tryezën e bukës në shtëpi, pa përmendur emrin e tij. U është bërë Cris LaCivita, si perëndi. Në takime me ata pak mbështetës që u ka mbetur, Berisha nuk ngurron ta përmendë emrin e tij, si “shpëtimtari Partisë Demokratike,  dhe si aleat i opozitës,”. E kush mund ti përtypë mashtrime të tilla në 2025  ?  Vetëm  ndonjë çoban mali. Askush tjetër. Madje edhe çobani, është me radio dhe televizor atje ku kullot bagëtinë, dhe e njeh mirë situatën politike.

Po pse ka marrë kaq superxhiro opozita, Berisha, Mul Noka, apo dhe ata deputetë të përgjumur të opozitës që deri dje nuk flisnin, dhe sot janë bërë të flaktë në Parlament ? Natyrisht, e kanë marrë “dozën e mashtrimit” nga Berisha, dhe mendojnë se “Cris LaCivita do ta shpjerë në pushtet PD”. Si mund të besosh se ardhja e një të huaji, kushdo qoftë ai, mund ti japë fitoren opozitës, kur ajo ka 1001 probleme të brëndshme dhe të jashtme? Si mund të gënjesh vehten, dhe të besosh Berishën se ardhja e amerikanit që i bëri marketing Donald Trumpit, do ti japë fitoren Berishës në Shqipëri ? Këto mund ti besojë vetëm një i marrë, një mediokër, dhe një njeri që nuk ka jetuar asnjë ditë në Shqipëri.

Dalin akuzojnë, dalin baltosin dhe fyejnë deputetë, zv.ministra, ministra, kryeministrin, kryetaren e Parlamentit, kreun  e shtetit, prokurorët, gjyqtarët, policët, bizneset, deri pastrueset e institucioneve, dhe nuk shikojnë se balta e zezë, i ka mbytur partinë. Si mund të harrojnë shqiptarët vjedhjet e qeverisjes Berisha nga 2005 deri 2013, si mund të harrojnë ata  Gërdecin me 26 të vrarë, 21 Janarin me 4 të vrarë, apo dhe piramidat e 1996 dhe vitin e zi 1997, ku u vranë mijëra  shqiptarët ( dhe vazhdojnë të vriten nga armët e depove) nga trazirat e stimuluara nga qeveria e Partisë Demokratike.

Superxhiroja e opozitës, pikërisht ditët e fundit,(pas ardhjes së amerikanit të mirëpaguar për marketing) tregon makthin e saj. Një opozitë 12 vjeçare, nuk mund  të shpresojë dhe ta bazojë fitoren  e saj, në ndihmën nga jashtë. Janë shqiptarët ata që bëjnë dallimin, diferencën, dhe ndajnë të mirën nga e keqja.

Shqiptarët nuk kanë nevojë tu bëjë marketingun e opozitës, një i huaj që vjen të marrë miliona, pa e njohur fare vendin ku bën deklarata të nxitura nga Berisha.