Familjarët e 23-vjeçarit që u vetëvar të shtunën në qelinë e burgut 302 në Tiranë ende nuk e dinë se si ka ndodhur ngjarja. Por, sipas tyre, ai ka qenë i pafajshëm dhe është arrestuar kot nga Policia.
Në këtë mënyrë ata dyshojnë se edhe vetëvrasjen Napulon Luca e ka kryer për shkak të padrejtësisë që iu bë, duke e arrestuar me të padrejtë. Një i afërm i viktimës, i kontaktuar nga gazeta “Panorama”, tha dje se nuk e dinë ende çfarë ka ndodhur, ndaj dhe nuk mund të flasë shumë pa e ditur me saktësi se si ka ndodhur ngjarja.
“Ne dimë vetëm aq sa kemi parë e lexuar në media. Arsyen e vërtetë, rrethanat si ka ndodhur ngjarja nuk na e kanë treguar ende. Po presim të na e thotë dikush që është përgjegjës për këtë punë. Nuk dimë çfarë të themi më shumë”, shprehet ai.
Ndërsa tregon se situata në shtëpinë e familjes Luca është mjaft e rëndë, pasi lajmi i vdekjes së 23-vjeçarit ka qenë i papërballueshëm, sidomos për nënën e tij. “Ai ishte i pafajshëm. E arrestuan kot”, tregon më tej i afërmi i Napulon Lucës, i cili dyshon se për këtë arsye ai mund të ketë vrarë veten.
Napulon Luca ishte arrestuar më 14 janar të këtij viti, bashkë me vëllezërit e tij, të cilët më pas u lanë të lirë. Ndërsa vetë viktima mbahej në paraburgim deri në përfundim të gjykimit për të, që në fakt nuk kishte nisur ende. I riu nga Dibra dhe banues në Tiranë akuzohej nga Policia për vjedhje.
Komisariati nr.3 është njoftuar nga shërbimet e Burgut 302, se në orën 02:15 të së shtunës një i dënuar është gjetur i varur me çarçaf në dhomën e tij, ku qëndronte vetëm. Policia ka nisur menjëherë veprimet hetimore, ndërkohë 23-vjeçari është transportuar me urgjencë në Spitalin “Nënë Tereza”, por mjekët e Spitalit të Burgut kanë konstatuar se ai kishte ndërruar jetë.
Luca kishte qenë i dënuar edhe më parë me akuzën e shkatërrimit të pronës dhe të kanosjes. Ndërsa së fundmi ishte vënë në pranga për vjedhjen e një banese në rrugën “Pric Vidi” në Tiranë dhe ishte arrestuar nga shërbimet e Komisariatit nr.3. Nga ana tjetër, ai ishte i dyshuar edhe për vjedhjen e tri banesave të tjera gjatë janarit të këtij viti. Bashkë me të, Policia arrestoi edhe vëllezërit e tij, të cilët u lanë të lirë disa ditë më pas./Panorama/a.m.
