Mbrëmjen e sotme, e ftuar në emisionin “Java në RTSH”, ishte Ministrja e Shtetit për Marrëdhëniet me Parlamentin, Elisa Spiropali.
Në panelin me analistët Lorenc Vangjeli dhe Preç Zogaj, Spiropali u shpreh se humbja e opozitës ka ardhur vetëm nga fakti se PD besoi se koha mjaftonte për të fituar.
“Opozita humbi për faktin se Basha dhe demokratët besuan se koha mjafton për të fituar. Cdo tejkalim i së drejtës të kthehet kundër, dhe cdo tejkalim i tillë, Bashës dhe PD-së i është kthyer kundër,”- u shpreh Spiropali.
Sakaq, lidhur me raportin e OSBE/ODIHR për zgjedhjet parlamentare të 25 prillit, Spiropali u shpreh se raporti vlerësoi në mënyrën më të mirë ndryshimet e bëra dhe theksoi se zgjedhjet ishin të lira.
“Njerëzit mendojnë se OSBE do të bëj me shkop magjik një zgjidhje. Raporti i thekson dhe vlerëson ndryshimet e KQZ dhe KAS, vlerëson se zgjedhjet kanë qenë të lira dhe aktorët kishin mundësi të bënin fushatë dhe qytetarët te votonin. Ashtu si theksohen ndryshimet, thekson edhe rekomandimet. Për mua dhe për PS, depolitizimi ishte celësi. Frika dhe mungesa e besimit bëri që opozita ta refuzojë,”– tha Spiropali në emisionin “Java në RTSH”.
/b.h
