Nga Ben Andoni
Ashtu si pritej, opozita ka inicuar fillimin e një reforme zgjedhore. Paçka se vëmendja e publikut tonë shpesh ndryshon kah, nisur nga provokimet e ndryshme historike dhe temat boshe, që tërheqin vëmendje e një grupi të madh komentuesish, duket se kjo reformë gëzon impenjimin më të madh. Të paktën nga angazhimet që ka dhënë i gjithë faktori shqiptar politik para Brukselit dhe kartën e dlirësisë që vazhdon të luajë. Fakt është që edhe në zgjedhjet e kaluara është folur shpesh për reformën por pastaj ajo është lënë gjithnjë për në fund, kur koha ka qenë e pamjaftueshme.
Opozita duket se e ka mbërthyer shumë kauzën e reformës, kjo edhe për faktin që në ditët e fundit është bërë publik koncepti i opozitës për strukturën që duhet të ketë sistemi zgjedhor në Shqipëri dhe po ashtu ngulmin për krijimin e Komisionit Ad hoc për reformën zgjedhore.
Ndërkohë që kërkesat opozitare nuk ndalen këtu, por kërkojnë votimin dhe numërimin elektronik, reformën e nevojshme kushtetuese që t’i përgjigjet këtij procesi, si edhe kontrollin e financimit të partive, etj.
Larg të gjithave, një problem i ri, që është përshfaqur para dy partive është përfshirja e diasporës, që do të thotë një energji shtesë për të kërkuar votat në areale, që nuk i shkojnë fushatave patetike shqiptare. Duket se PS-ja e ka kuptuar me kohë dhe po e ndjek më shumë se PD-ja zhvillimin që lidhet me diasporën. Këtë e tregon krijimi i një dikasteri të ri, që i kushtohet asaj e që nuk duket thjesht për të thithur energjinë e saj (një fakt që u promovua muaj më parë në samitin e Tiranës), por edhe për të kanalizuar politikisht prirjet e një pjese të popullatës që është bajagi e madhe. Megjithatë, problemi më i madh i administrimit të diasporës mbetet te krijimi i regjistrit kombëtar dhe modaliteti i regjistrimit. Për hir të së vërtetës, duke parë sesi shkoi censusi i fundit, nuk mund të mendohet se mund të jetë aq i lehtë regjistrimi për një pjese të konsiderueshme të shqiptarëve që jetojnë jashtë vendit. Duke përfshirë këtu dhe mundimin e madh që shkon nga palët për të manipuluar atëherë mund të kuptosh këtë ngarkesë kaq të madhe. E për hir të së vërtetës, kjo nuk i duhet opozitës, që tashmë kartën e reformës zgjedhore e ka nxjerrë dhe me këtë rast plotëson dhe kreditet e saj para faktorit ndërkombëtar. Gjithsesi, zaret e diasporës janë hedhur dhe mbetet të shihet sesa të zotët do jenë politikanët shqiptarë t’i përfshijnë në zgjedhjet e ardhshme. Një shembull, që tashmë funksionon në Ballkan.(Javanews)
