Nga Alfred Peza
Për të gjithë ata që ende nuk e kanë të qartë se përse deri më 30 Qershor, opozita jashtparlamentare nuk pritet të ulet në dialog me Edi Ramën, do mundohem tiu ofroj këtu thjeshtë dhe shkurt, argumentat kyçe. Pavarësisht se Edi Rama edhe sot theksoi si prej shumë muajsh, se dora e dialogut është e shtrirë, edhe pse të gjithë ndërkombëtarët kërkojnë uljen në tyrezë të palëve pa kushte, si Lulzim Basha ashtu edhe Monika Kryemadhi këmbëngulin e këmbëngulin se dialog me Edi Ramën nuk do të ketë.
Pse kjo qasje?
A është thjeshtë një kusht i panegociueshëm për ndonjë arësye konkrete? Apo prapa këtij refuzimi fshihet një sebep i madh për një arësye madhore, që përbën edhe thelbin e strategjisë që po ndjek opozita jonë jashtparlamentare?
Për këtë na vijnë në ndihmë dy deklarata:
E para, është ajo e Myslim Murrizit sot Nën Kryetar i Kuvendit, i cili kujton detajet nga debati i zhvilluar në Grupin Parlamentar të PD, ditën që u mor vendimi për djegien e mandateve:
“Në qëndrimin formal edhe gjatë mbledhjes së Grupit Parlamentar, unë nuk e di se çfarë flitet nën tavolinë mes Berishës dhe Bashës, por që të jem i hapur ka qenë gati-gati në të njëtën linjë me të fjalës sime gjatë mbledhjes së grupit parlamentar për dorëzimin e mandateve. Ai ka thënë që “ndërkombëtarët do t’i kemi kundër. Ky është një vendim i ashpër, luhet “all-in”, për të gjitha. O i humb, o i merr të gjitha”. Kanë qenë 13 deputetë që folën kundër djegies së mandateve në atë grup parlamentar.”
Ndërsa vetë lideri historik i PD, Sali Berisha më herët, më 6 maj ka thënë se:
“Kjo është një betejë që padiskutim do të shkojë në një finale. Dhe kjo betejë nuk shoh zgjidhje veç një përplasje shumë të fuqishme. Kjo është një betejë në të cilën janë konsumuar mjete të tjera. Është konsumuar sepse ka pasur një marrëveshje të 2017 e cila në vend që ti jepte vendit paqen që meritonte për shkak të zgjedhjeve i dha Dosjet 339 dhe 184, që faktuan krimin zgjedhor. Ose e përmbysim këtë regjim, ose do shuhet përfundimisht opozita. Marrëveshje me Edi Ramën nuk ka asnjë burrë që të bëjë më”.
Kaq mjafton për të kuptuar se dalja e “Opozitës së Bashkuar” nga Parlamenti dhe mosfutja e saj në zgjedhjet lokale të 30 qershorit të këtij viti, ska të bëjë me kërkesa që mund të zgjidhen me dialog, as me çështje që mund të adresohen në reformën e re elektorale, as me nevoja që mund të rregullohen në sistem, apo me anë të mjeteve politike e demokratike ose nëpër institucioneve kushtetutese. Jo.
Tashmë është më e qartë se çdo herë tjetër se e gjitha çfarë opozita jashtparlamentare synon, nuk ka të bëjë asfare me rregullat e lojës demokratike. Jo.
E gjitha ka të bëjë me një lojë ku luhet: “All-In. Për të gjitha. Ose i humb, ose i marr të gjitha”.
Për këtë, Sali Berisha ia ka përcaktuar prej kohësh edhe vijën e kuqe të kësaj loje Lulzim Bashës e Monika Kryemadhit: “Ose e përmbysim këtë regjim, ose do shuhet përfundimisht opozita. Marrëveshje me Edi Ramën, nuk ka asnjë burrë që të bëjë më”. Kaq.
Ndaj mos u lodhni më që të luani ende lojën e pakuptimtë të kungulleshkave. Sali Berisha që ka edhe çelësin e opozitës, ia ka mbyllur derën dialogut, deri më 30 Qershor. Në këto kushte, nuk besoj se ndokush mendon se Lulzim Basha është nga ata burra, që të dali jashtë asaj dere, e të bëjë marrëveshje me Edi Ramën.
Kaq e thjeshtë është. Ndaj, le të shohim çdo ndodhi një ditë pas zgjedhjeve: Do përmbyset mazhoranca e Edi Ramës apo do të shkrihet opozita e Sali Berishës, Lulzim Bashës, Ilir Metës e Monika Kryemadhit?
Deri atëherë, mos harroni të dëgjoni herë pas here këngën e Freddie Mercury:
“The show must go on”!
