Nga Mero Baze
Caktimi i datës dhe vendit të ri të protestës, në oborrin e Kuvendit të Shqipërisë, është shenja e parë e fortë që tregon se “revolucioni” i premtuar tani u rikthye prapë në shtratin e vet të 500 vetëve agresivë. Përpjekja e Sali Berishës për të provokuar protesta masive përmes të ashtuquajturave protesta kombëtare dështoi si asnjëherë më parë. Në çdo orvatje të Berishës për protesta kombëtare ka pasur së paku një protestë të madhe që ka shkuar deri tek 8 deri 10 mijë vetë.
Katër protestat e Berishës nuk i kaluan 4 mijë vetët dhe protesta e fundit, ngaqë ishte tërësisht e dështuar, u shndërrua në marshim të dhunshëm nëpër kryeqytet, duke përfunduar tek vila e Enver Hoxhës.
Dhe ajo që pritej të ishte mbyllja më triumfaliste për ta u kthye në mbylljen më disfatistë të revolucionit, pasi vetë Berisha u kompleksua nga sulmi mbi vilën e Enver Hoxhës dhe ka 48 orë që justifikohet se sulmuan ngaqë na gënjyen se ishte Edi Rama.
Nëse do të kishim një prokurori që nuk është e tredhur nga Berisha, pohimi se sulmi ishte dirigjuar nga vetë Berisha “pasi nuk e dinte se aty kishte të huaj” është provë fakti që ai ka marrë përsipër një sulm të dhunshëm mbi një institucion kulturor duke rrezikuar jetën e artistëve.
Fakti që aty ka të huaj nuk e shton veprën penale dhe as e lehtëson. Berisha ka kriminalizuar veten duke thënë se nuk ka pasur qëllim të huajt, por ka pasur qëllim godinën.
Por përveç anës penale, kjo zbythje e tij i ka hequr revolucionit gjithë triumfalizmin që në fakt dukej shumë e menduar dhe e planifikuar, edhe pse shumë banale.
Tani dhe ushtarët më radikalë të revolucionit, kur dëgjojnë Berishën që thotë se sulmi mbi godinën ku ka banuar Enver Hoxha ishte gabim, ndjehen të dështuar, pasi udhëheqësi i tyre është duke vajtuar ndërkohë për fishekzjarrët dhe molotovët e tyre.
Po t’i shtosh kësaj dhe neverinë që ngjall në Tiranë një bandë primitive që turret rrugëve duke djegur biznese dhe muzeume, është e sigurt se revolucioni ka mbetur i izoluar vetëm në oborrin e SHQUP-it.
Është kjo arsyeja që tani protesta nuk është më me datë, por është e lidhur me ngjarje dhe në rastin konkret me seancën ku do diskutohet imuniteti i Ballukut. Pra, duke qenë i paaftë të mbajë në këmbë revolucionin që nisi, duke qenë i dështuar në shifra dhe i neveritur nga kryeqyteti, ai po shpreson të mbledhë njerëz para parlamentit që edhe nëse bëhen 200 vetë, mbushet oborri.
Kaq fuqi i ka mbetur. Marshimi i çoroditur rrugëve të Tiranës duke djegur biznese dhe godina tani kanë lënë në oborr të SHQUP-it vetëm grupin e molotovëve. Ata nuk kanë ku shkojnë se tani janë dhe të skeduar nga policia. Revolucioni që u nis të përmbyste qeverinë tani ka përfunduar me shifrat e njerëzve që ndjekin folkloret e Berishës. Ndryshimi i vetëm është se këtu s’ka të çmendur, po vetëm budallenj.
