Sali Berisha u përpoq dje të bënte të besueshëm episodin e përjashtimit nga Lulzim Basha të shumë figurave të njohura të PD-së nga listat për deputetë më 2017. Ishte fjala për Selamin, Boden, Patozin, Bregun, Topallin etj., të cilët nuk u gdhinë në listat e kandidatëve për deputetë. Berisha thotë se ka thirrur Lulzim Bashën dhe i ka thënë që “ata kanë të drejtë të reagojnë politikisht ndaj teje”.
Në fakt, ata reaguan politikisht. Bënë deklaratat e tyre, madje pas humbjes së thellë në zgjedhje u konstatua se PD uli me 250 mijë vota korpusin e saj të votuesve, dhe kjo iu faturua edhe këtij veprimi.
Po cili ishte qëndrimi politik i Berishës ndaj kritikave të tyre?
Gjatë intervistës në emisionin “Studio e Hapur” në News24, më 22 maj 2017, i pyetur se çfarë mendonte për Bregun, Selamin, Topallin Boden dhe Patozin që e kishin kundërshtuar hapur disa herë Lulzim Bashën, Berisha deklaroi me bindje se:
“PD ka pasur, ka dhe duhet të ketë mendimin ndryshe. Nuk dëmtohet një parti nga mendimi ndryshe.”
Pra, Berisha ka qenë tërësisht në anën e Bashës dhe i ka quajtur këta thjesht mbartës të “mendimit ndryshe”.
Në fakt, i ka tallur.
Tani, pas tetë vitesh, kur atij i kanë mbetur në dorë gërmadhat e partisë së tij, po përpiqet të zbusë rrënimin, duke ia hedhur fajin Lulzim Bashës.
Po a nuk ishte ky që ka sulmuar partinë e Astrit Patozit më 2019 dhe thërriste kandidatët e tij në zyrë, tek kati i 12-të, për t’i tërhequr nga gara dhe për ta denoncuar Patozin si dikë që i kishte futur në listë pa i pyetur?
A nuk ishte ky që denoncoi Ridvan Boden, pse pranoi të bëhej anëtar i Bordit të Bankës së Shqipërisë – një detyrë tërësisht profesionale, që lidhej me përvojën e tij si ish-ministër i Financave?
A nuk ishte ky që injoroi kritikat e Eduard Selamit për manipulime në Kuvendin ku ai garoi përballë Bashës, dhe më pas tallej duke i thënë:
“I ke ngulur thikë pas shpine PD-së që nuk denoncon manipulimet”?
A nuk ishte ky që denonconte Topallin, pse krijoi një parti tjetër më 2021, madje vinte “zagarët” e vet ta akuzonin se po e copëtonte partinë me urdhër të Ramës përmes OSHEE-së?
A nuk ishte ky që sulmoi Majlinda Bregun, pse u bë drejtuese e RCC-së, një institucioni të BE-së për rajonin, vetëm sepse për këtë duhej miratim i qeverisë shqiptare?
Po, nëse ai mendonte vërtet që “ata kishin të drejtë të reagonin politikisht ndaj Bashës”, pse nuk u doli zot atyre, por Bashës?
Në fakt, i doli zot vendimit që mori kundër tyre.
Dhe nëse e kishte kaq merak, tani që ka zaptuar PD-në me forcë, pse nuk e vuri në vend këtë padrejtësi, duke i kthyer ata në PD dhe duke i vendosur në lista të sigurta në shenjë reflektimi ndaj asaj që paska bërë Basha? E ka bërë këtë vetëm për Topallin, tek besnikëria e së cilës nuk dyshon.
Tani e di mirë që do të humbasë dhe nuk do të ketë njerëz që mund t’i bëjnë gjyq më 12 maj.
Kaq është e gjithë “apologjia” e tij për ata që ka përjashtuar nga PD ndër vite.
Ai po bën sikur po vajton sot për ata që, edhe po t’i lutësh, nuk kthehen më në ato gërmadha që ai ka lënë në PD – pikërisht sepse e dinë kush është Berisha.
Po të ndjente se do të shkonin, do të vazhdonte t’i mallkonte si armiq të PD-së dhe përçarës të saj. Siç ka bërë 33 vjet me radhë
