Nga Mero Baze/
Pas një pune rutinë një vjecare socialistët u detyruan sot të bëjnë publike 7 propozimet e tyre për reformën zgjedhore, në mënyrë të njëanshme, pasi Basha u tërhoq nga një qëndrim i qartë për reformën, duke gjetur arsye politike që nuk lidhen me reformën. Edhe pse për muaj të tërë përfaqësuesit e tij kanë punuar bashkë me OSBE në Komisionin e Reformës Zgjedhore, ai ju nda Komisionit në momentin e fundit, për të mos qenë pjesë e propozimeve për të cilat ndërkohë ka rënë dakord.
Po përse Basha i shamnget qëndrimit të tij zyrtar për reformën zgjedhore?
Arsyeja nuk është vendimi i tij për bojkotimin e zgjedhjeve. Ai është pasoja. E gjitha është më shumë një përpjekje për të shmangur ballafaqimin e tij me aleatët për këtë çështje.
Ajo që Lulzim Basha ka frikë të mbaj një qëndrim për reformën zgjedhore, dhe bën sikur nuk e ka mendjen, ka të bëj me qëndrimin e tij hilanjoz ndaj partive të vogla në koalicion. Partitë e vogla të koalicionit opozitar janë bashkuar prej kohësh dhe kanë një paketë të tyre propozimesh të cilën e kanë kusht për bashkëpunimin me Partinë Demokratike. Paketa është e tillë që kushtëzon shumë Partinë Demokratike dhe ul peshën e saj reale në raport me partitë e vogla të koalicionit, duke u “gjobitur” prej tyre, në kompesim të besnikërisë politike që ato kanë treguar.
Lulzim Basha nuk ka asnjë shans t’i kënaq orekset e tyre, por mbi të gjitha nuk ka asnjë dëshirë. Ai nuk ka ndërmend të kaloj në një sistem mazhoritar siç kërkojnë ata, ose në ndonjë sistem propocional kombëtar, nuk ka ndërmend të ndryshoj formulën e komisionerëve të KZAZ dhe as të bëj ndonjë sistem preferencial, siç thotë dikush prej tyre. Por mbi të gjitha ai ka pritoritet të mos hyj në konflikt me ta.
Edi Rama për ta vendosur në pozitë edhe më të vështirë, ka deklaruar se qeveria është e gatshme ta lërë në dorë të PD të zgjedhë për ndryshimet në sistemin zgjedhor me kushtin që ato ndryshime t’i certifikoj OSBE. Kjo e ka vënë Lulzim Bashën në pozitë të vështirë, pasi ai nuk ka se si t’u dredhoj kërkesave të aleatëve, pasi praktikisht Edi Rama e ka bërë atë zot të reformës zgjedhore. Ai i ka dhënë praktikisht Bashës të gjithë pushtetin për të bërë ndryshimet që do dhe që pranohen nga OSBE.
Është pikërisht ky pozicion që Bashën e torturon më shumë se çdo akt tjetër i Edi Ramës. Në këto momente, nëse ai merr përsipër atë që i ka ofruar Edi Rama, ai shkatërron koalicionin e tij, pasi ai nuk ka ndërmend të plotësoj asnjë kërkesë të partive të vogla. Dhe duke qenë se Rama i ka lënë dorë të lire, ai ka preferuar braktisjen në momentet e fundit të Komisionit të Reformës Zgjedhore, me arsye tërësisht të paqarta dhe sebepe që nuk kanë lidhje me reformën.
Në një farë mënyre ai po bën sikur nuk e ka mendjen tek reforma dhe se atë e paraqet si problemin më të vogël. Në fakt e ka problemin më të madh, pasi qëndrimi ndaj reformës dikton fatin e koalicionit të tij me partitë e vogla. Dhe ai më mire preferon ti ketë ato në krah e të mos ketë fare reformë, se sa të bëj reformën dhe të humbas ato. Se pastaj i bie të humbas edhe zgjedhjet dhe aleatët. Kështu humbet vetëm zgjedhjet.
