Me numërimin e votave të diasporës, qarku Vlorë mbyllet me 9 mandate të fituara nga Partia Socialiste. Bledi Çuçi, drejtuesi politik i PS në këtë qark, gjatë një interviste për Euroneës Albania pak pasi kishte përfunduar procesi, tha se ky ishte një rezultat historik për PS-në.
“Bindshëm PS ka fituar 9 mandate në Vlorë. Është një rezultat historik, që nuk është arritur asnjëherë më parë. Besoj se është meritë e githçkaje ka bërë Partia Socialiste dhe qeveria Rama për qarkun e Vlorës. Një konfirmim i përkrahjes për Partinë Socialiste”, deklaroi Çuçi.
Sipas tij rol në këtë rezultat historik për PS-në ka luajtur edhe vota e diasporës. Mandati i nëntë tha Çuçi është një përgjegjësi shumë e madhe.
“Kemi shumë për të punuar, për të rienergjizuar administratën vendore, për të rifreskuar partinë dhe për të justifikuar mandatin e nëntë dhe për ta mbajtur pse jo këtë mandat edhe në zgjedhjet e radhës”, u shpreh Çuçi.
Në vijim të intervistës ai vlerësoi edhe garën civile mes kandidatëve brenda listës së hapur të Partisë Socialiste. Kjo ka qenë një nga fushatat model në qarkun Vlorë shtoi ai.
