Partitë kryesore në vend kanë vijuar edhe sot turin e akuzave dhe kundërakuzave, Ka qenë deputeti i Partisë Socialiste, Ervin Bushati, që në një dalje për mediet ka përsëritur mangësitë e bashkisë Tiranë nën drejtimin e kreut aktual Lulzim Basha.
“Që Lulzim Basha ka dështuar në kryeqytet këtë tanimë e ka pranuar edhe kandidati i tij për Tiranën. Është rast unik kur vet kandidati i Tiranës, bën gallatë me dështimet e kryetarit të partisë së tij. Në fakt, është e pamundur mos të kritikosh Lulin. Asnjë kryetar bashkie në historinë e Tiranës nuk ka qenë kaq i paaftë, kaq dembel dhe kaq i dështuar” – tha Bushati.
Sipas tij, Basha premtoi se do t’i jepte zgjidhje problemit të trafikut dhe parkimit në Tiranë dhe se do të garantonte lëvizje të lehtë, të shpejtë dhe të sigurt si për këmbësorët ashtu edhe për automjetet në të gjithë qytetin.
“Në fund të mandatit të Lulit, lëvizja është bërë më e vështirë edhe për këmbësorët, edhe për automjetet. Sepse investimi i vetëm që ka bërë në këtë mandat janë vijat e bardha, që siç e tha dhe Halimi zhduken për 5 ditë” – u shpreh deputeti i PS.
