Partia Socialiste do të mbledhë sot asamblenë Kombëtare, dy vite pas mbledhjes së fundit të kësaj asambleje.
Burime pranë Partisë Socialiste bëjnë me dije se mbledhja do të nisë në orën 11:00 dhe në qendër të punës së saj do të ketë analizën e rezultatit zgjedhor të 21 Qershorit. Po ashtu në program të punës së kësaj asambleje do të jetë dhe ngritja e një grupi të posaçëm, i cili do të punojë për të përgatitur ndryshimet në statut.
Sipas burimeve pranë PS-së bëhet e ditur se organizimi strukturor i saj do të marrë trajtën e ndarjes së re territoriale, ku do të ketë 61 kryetarë të PS-së në bashkitë e reja, të cilët do të jenë përgjegjës kryesorë për rrugën e partisë në këto zona.
Po ashtu gjatë mbledhjes pritet të përcaktohen edhe sekretarët e rinj të partisë. Kjo, pasi disa prej tyre kanë përfunduar mandatin dhe të tjerë kanë marrë poste ministrore dhe nuk kanë pasur mundësi t’i mbulojnë të dyja pozicionet njëherësh. Ende nuk dihet nëse do të ketë ndonjë ndryshim statuor lidhur me çështjen e zgjedhjes së kryetarit të Partisë Socialiste.
