“Në 2011 Lulzim Basha bëri një premtim nga ato që vetëm Luli mund të bëjë.
Do të shndërroj Spitalin e Sanatoriumit në një spital modern vetëm për qytetarët e Tiranës dhe njësitë vendore fqinje, tha Luli.”
Kështu u shpreh sot në një deklaratë për mediat deputetja socialiste Blerina Gjylameti, tek theksoi dhe njëherë se Basha mashtroi para 4 vitesh dhe sipas saj edhe kandidati i PD, Halim Kosova po bën të njëjtën gjë.
“Si për ta bërë krejtësisht qesharake situatën sot ky premtim është ricikluar edhe nga kandidati i Lulit për Tiranën i cili ka filluar të premtojë ngritjen e një spitali bashkiak. Madje ky është i vetmi premtim konkret i kandidatit të Lulit.
Luli u emërua kryetar i Bashkisë së Tiranës nga një doktor dhe ka caktuar kandidat për Bashkinë e Tiranës një tjetër doktor, por natyrisht nga shëndetësia merr vesh akoma më pak se nga punët e bashkisë. Sepse Bashkia e Tiranës ka po aq mundësi të ndërtojë një spital bashkiak sa çka mundësi të ndërtojë baza ushtarake. Thjesht nuk ia lejon ligji. Ndërtimi dhe menaxhimi i spitaleve është kompetencë e Ministrisë së Shëndetësisë dhe këtë e di çdo njeri që merr mundimin të shfletojë ligjin. Ky është një fakt që e di çdo punonjës i sistemit të shëndetësisë me përjashtim të kandidatit të Lulit me sa duket
Nga ana tjetër ligji i njeh Bashkisë së Tiranës përgjegjësinë për ndërtimin dhe mirëmbajtje të qendrave të kujdesit parësor, pra të ambulancave të lagjjes. Kjo po që është kompetencë e Bashkisë dhe madje Luli u premtoi qytetarëve të Tiranës se do të shumëfishonte numrin e këtyre qendrave. Por edhe këtë premtim e mbajti po aq sa ç’mbajti premtimin për tramin, bulevardin e ri apo kartën e studentit.”, tha Gjylameti
Gjylameti u shpreh se 21 qershori do të jetë dita kur qytetarët do të votojnë për një kryebashkiak që punon për qytetin.
“Për fatin e mirë të qytetarëve mandatit të Lulit tani i ka ardhur fundi e bashkë me të edhe premtimeve bombastike që nuk realizohen kurrë. Në 21 qershor qytetarët do të votojnë për një kryebashkiak që punon për qytetarët dhe që do t’i rikthejë normalitetin Tiranës. Në 21 qershor do të votojnë për ta kthyer Tiranën në drejtimin e duhur.”, përfundoi nga selia e PS Gjylameti.
