Grupi i punës për strategjinë elektorale dhe koordinatorët e kanë zyrtarizuar tashmë shtyrjen e Kongresit të Partisë Socialiste, por ende nuk është caktuar një datë e saktë, shkruan Gazeta Shqiptare. Sipas rregullave, statutore të PS-së, datën e Kongresit e përcakton Asambleja Kombëtare, për të cilën gjithashtu nuk ka ndonjë thirrje.
Kryetari i asamblesë e njëherësh kryetar i grupit parlamentar të PS-së, Gramoz Ruçi, i pyetur dje nga Gazeta Shqiptare, se a ka një datë për Kongresin tha: “Do të ketë njoftim në kohën e duhur”. Dje, ka pasur dy takime të anëtarëve të grupeve të punës që po merren me përgatitjen e zgjedhjeve brenda partisë dhe përgatitjen e kongresit.
Në takimin e parë është konfirmuar shtyrja e kongresit, për shkak të vonesave që ka pasur në afatet e realizimit të zgjedhjeve në strukturat e partisë në rang vendi. Kryeministri Edi Rama ka shkuar dy herë dje në selinë e PS-së për të kaluar disa nga çështjet që kanë sjellë ngecjen e procesit zgjedhor.
Nga ana tjetër, ende nuk ka një produkt as nga grupi i punës për ndryshimet në statutin e partisë. Secili prej nëngrupeve ka dorëzuar produktin e punës së tij. Janë marrë modelet e partive simotra në Evropë, PS franceze, socialdemokratëve gjermanë, laburistëve anglezë të Toni Blair janë përkthyer në shqip, por ende nuk ka një projekt, i cili duhet të ishte dërguar në bazë, për të thithur edhe mendimin e bazës së partisë.
Një nga pikat që mendohet se do të propozohet dhe për të cilën është debatuar më së shumti, është ajo e modelit laburist që kur partia fiton zgjedhjet, kryetari i saj nuk ka nevojë t’u nënshtrohet zgjedhjeve brenda partisë. Të premten e shkuar, kryeministri Rama mblodhi sërish koordinatorët, prej të cilëve ai u njoh me ecurinë e procesit e zgjedhjeve në qarqe të ndryshme. Kryetari i PS-së, Rama, ka kërkuar që të mbyllen zgjedhjet e krerëve të organizatave socialiste, në ato qarqe, ku ende ka problem brenda muajit janar.
Të gjithë koordinatorët e qarqeve kanë dhënë informacionet e tyre për ecurinë e këtij procesi, por është vënë re se vonesa ka në disa bashki të jugut, si në disa bashki të qarkut të Vlorës, pjesërisht puna është mbyllur në qarkun e Durrësit. Të parët që kanë mbyllur procesin janë bashkitë e qarkut të Tiranës dhe ato të Fierit. Ka edhe disa bashki të vogla, por pjesa më e madhe është ende në fazën e parë, atë të zgjedhjes së krerëve të organizatave socialiste, proces ky që duhet të ishte mbyllur që prej datës 10 nëntor.
E kështu rrjedhimisht të gjitha afatet për zgjedhjet e tjera brenda strukturave kanë ardhur në shtyrje, pikërisht prej varësisë që ato kanë nga zgjedhja e njëra-tjetrës. Një tjetër sfidë e socialistëve është edhe shtimi i numrit të anëtarësisë deri më 12 qershor, datë kur PS mbush 25 vjet nga themelimi i saj.
Burimet bëjnë me dije se është tepër i vështirë për t’u përmbushur objektivi i vënë nga kryetari për një numër 150 mijë anëtarësh. Listat e anëtarëve tashmë janë duke u dixhitalizuar, por edhe duke u pastruar nga emrat fiktivë. E gjitha kjo po bëhet që PS të ketë një pasqyrë të plotë të anëtarësisë, për të ditur paraprakisht mbështetjen për PS në zgjedhjet e 2017.
