Sot Partia Socialiste shënon 24 vjetorin e themelimit të saj. Për të folur për këto 24 vite dhe për momentet më të vështira dhe më të mira të PS, është shprehur edhe deputeti Namik Dokle, njëkohësisht themelues i kësaj force politike.
Në një intervistë për A1 Report, Dokle tregon disa nga momentet më të vështira të PS, por njëkohësisht edhe momentet më të bukura.
“Momentet më të bukura janë ato që janë edhe më të vështira, sepse kur del një moment i mirë nga një situatë e vështirë, është moment më i mirë, sidomos kur ndikon edhe në ecurinë e vendit. 2 referendumet ne 1994, për të rrëzuar kushtetutën që nuk sillte asgjë të mirë për shqiptarët, apo edhe referendum i dytë po për Kushtetutën në 1998 që e kemi aktualisht. Që ishte një hap i rëndësishëm në reformimin e shtetit shqiptar. Në 24 vite kemi kaluar edhe vështirësi të tjera që i kemi zgjidhur në të mirë të popullit e kombit. Në 24 vite kemi qenë 11 vjet pushtet 13 në opozitë, ne nuk kemi menduar të fitojmë si. Aktualisht jemi në pushtet dhe ky 24-vjetori e gjen qeverinë e koalicionin në kulmin e punës dhe kulmin ndaj reformave. Sfida kryesore të ndërtojmë një Shqipëri europiane, jo vetëm e PS por edhe partive të tjera politike që duhet të kontribuojnë në këtë aspekt. Dhe të gjitha janë thirrur për të zhvilluar një reformë të thellë. Sfida janë edhe lufta ndaj varfërisë, papunësisë, për ta bërë vendin gati për integrimin Europian. Sfida më e rëndësishme është zbatimi një legjislacioni evropian”, u shpreh deputeti Dokle.
