Mes dhunës dhe punës, mes patriotëve të vërtetë dhe atyre “fake”, mes atyre që dinë të ndërtojnë shtet dhe atyre që dinë vetëm ta shkatërrojnë, është vija e madhe ndarëse përmes së cilës, kryetari i Bashkisë së Tiranës, Erion Veliaj ftoi qytetarët e Tiranës të zgjedhin në 25 Prill, pasi sipas tij këto zgjedhje ndajnë dy epoka: ata që kanë hallin e votimeve të ardhshme dhe ata që mendojnë për gjeneratën e ardhshme.
Nga Asambleja Socialiste e Njësisë 4, drejtuesi politik i PS për Qarkun e Tiranës shigjetoi liderin e opozitës Lulzim Basha, i cili “është kthyer në dhunuesin dhe bllokuesin më të madh të Tiranës”.
“Ne nuk ndahemi me të majtë dhe të djathtë. Ne ndahemi me ata që besojnë te puna dhe ata që besojnë te dhuna. Tre vjet bllokim, bllokim, bllokim! Digj goma, digj policinë, hidh fishekzjarre, blloko rrugën. Cilën rrugë bllokon? Rrugën ku kalon nëna jote, rrugën ku kalon babai yt, ku kalojnë gjyshërit e sëmurë, ku shkon fëmija yt në çerdhe dhe në kopsht? Kë po bllokon për ideal të partisë? Nuk jemi ne të ndarë në socialistë dhe të tjerë. Ne jemi të ndarë me ata që punojnë dhe ata që e kanë dhunën si mjet”, u shpreh Veliaj.
Ai theksoi se Partia Socialiste është e vetmja që di dhe mund të bëjë shtet. “Shihni Lungomaren e Vlorës, shihni Pazarin e Korçës, shihni Pazarin e Krujës, shihni të gjitha qendrat e qyteteve. Pra, një grup që, ku vë dorë e transformon dhe një grup tjetër që ku vë dorë e shkatërron. Ju kujtohet Zogu i Zi? Një moment pati një qeveri që nuk linte bashkinë të punonte dhe vajti fadroma në atë që do kishte qenë një zgjidhje që ne tani po e bëjmë te Shqiponja,” u shpreh Veliaj.
Kryetari i Bashkisë i kujtoi Lulzim Bashës 4 vilat e ngritura në kohën e pandemisë, apo shitjen e kauzës së Astirit për makinën luksoze të kompanisë që do ndërtonte në Unazën e Re.
“Si mund të jesh lideri i opozitës, të kërkosh të vish në pushtet, dhe në vitin e tërmetit të bëhesh me 4 shtëpi, 2 në kodrat e Tiranës dhe 2 në bregun e Gjirit të Lalzit?! Si ka mundësi që babëzia nuk njeh limit?! Si ka mundësi që mban vendin peng për 3 vite për të bërë një unazë dhe e shet kauzën për një makinë?! Si ka mundësi që nis dhe thua, “unë do shtrihem përtokë te teatri” dhe sapo të puqen interesat, bën sikur ike dhe fjete gjumë? Si ka mundësi që thua, “unë për Rrugën e Kombit do vdes këtu dhe unë nuk e lë traun”?! Të gjithë e dinë çfarë mori. Pyetja është: Si ka mundësi, dikush që vë kaq shumë gjoba në opozitë, të jetë alternativë për të qeverisur?!”, pyeti Veliaj.
Ai bëri jo pak ironi edhe me faktin se kryedemokrati Basha nuk takon njerëz të zakonshëm, por zgjedh të takojë vetëm kushërinj dhe të njohur të familjes së tij.
“E pashë sot, kishte dalë nga selia për të takuar popullin, se medemek lideri duhet të takojë popullin. Patjetër, por duhet të takojë popull prej vërteti, jo kushërinjtë e gruas të veshur si taksistë. Duhet të takojë popull prej vërteti, jo të sjellë popull nga Paskuqani dhe t’i takojë sikur jetojnë te Komuna e Parisit, sa njërit prej tyre i shpëtoi edhe goja dhe tha, “unë jam nga Paskuqani, por më solli forumi këtu që të të takoj ty”. Duhet të takosh popull prej vërteti, jo kryetarin e partisë, të veshur si popull te dyqani,” u shpreh Veliaj.
“Unë besoj fort se kjo fushatë do të ndajë dy epoka në Shqipëri. Këto zgjedhje do të ndajnë dy gjenerata në Shqipëri: Ata e kanë hallin tek zgjedhjet e ardhshme ne e kemi hallin tek gjenerata e ardhshme; ata e kanë hallin tek lista e deputetëve, ne jemi marrë sot gjithë ditën me listën e strehimit, me listën e shtëpive, me listën e rimbursimeve, me listën e kompensimeve, me listën e rindërtimeve, me listën e shkollave, kopshteve, çerdheve,” e mbylli fjalën e tij Erion Veliaj.
