Partia Socialiste ka nisur të zbatojë ligjin për dekriminalizimin. Kjo forcë politike ka nisur “filtrimin” e individëve që do të jenë pjesë e strukturave të saj.
Si fillim do të jenë të përzgjedhur 61 kryetarët e degëve të partisë që do t’i nënshtrohen kritereve të ligjit të miratuar me konsensus për dekriminalizimin.
Megjithatë, ky është vetëm hapi i parë, pasi Partia Socialiste do të nxjerrë një tjetër udhëzim më të gjerë për të gjitha nivelet partiake.
Procesi po përqendrohet vetëm tek kryetarët e degëve për shkak se po zhvillohen aktualisht zgjedhjet, megjithëse 30 për qind e tyre janë përzgjedhur tashmë. Megjithatë, edhe këta të fundit do të jenë pjesë e verifikimit të tyre.
Nëse ligji i dekriminalizimit do të zbatohet plotësisht, partitë politike duhet të heqin jo pak emra nga radhët e tyre. Zhvillime të reja në këtë drejtim priten gjatë muajit janar të vitit të ardhshëm.
Pritet që edhe disa deputetë të lënë vendin e tyre në Parlament për shkak të të shkuarës së tyre kriminale.
/Dita/
