Partia Socialiste ka vijuar edhe sot akuzat ndaj Lulzim Bashës. Me anë të një deklarate për shtyp të dhënë nga deputeti socialist Artan Gaçi, PS deklaron se Basha nuk ka pasur e as nuk ka vizion për Tiranën.
Gaçi deklaroi se ishte Lulzim Basha ai që premtoi një mal me projekte dhe sot, në fund të mandatit nuk ka mbajtur asnjë prej tyre.
“Lulzim Basha u bëri qytetarëve një mal me premtime kur u emërua Kryetar i Bashkisë së Tiranës. Sot, katër vjet më pas ai po i ikën si ndonjë frikacak përballjes me qytetarët për bilancin e këtyre premtimeve. Sepse në 4 vjet e vetmja punë që ka bërë Luli ka qenë të paguajë rrogat e stafit të bashkisë. Vetëm kaq.
Premtoi se qytetarët do të ecin në trotuare cilësorë e të rehabilituar. Premtoi se trotuaret do të çlirohen nga zëniet abuzive. Dhe natyrisht nuk mbajti as njërin e as tjetrin premtim.
Gropat dhe pllakat e thyera tek të cilat s’vë dorë njeri prej vitesh, shitësit ambulantë që janë fanepsur në çdo cep e qoshe, tavolinat e lokaleve që kanë mbirë kudo duke zënë hapësirat publike me bekimin korruptiv të Bashkisë Tiranë, e kanë kthyer lëvizjen nëpër trotuarë në një sfidë të vërtetë për çdo qytetar.”, tha Gaçi
PS nga ana tjetër thotë se Basha jua vështirësoi jetën qytetarëve dhe se atij nuk i intereson aspak jeta e qytetarëve. Në deklaratë thuhet poashtu se 21 qershori do të mbyllë kapitullin e Bashës dhe do ët votojnë për drejtimin e duhur, për Erion Veliajn.
“Partia Demokratike del përditë e na thotë se Luli është çun me vizion, se ka menduar për tramin dhe bulevardin e ri. Por ja që vizioni i Lulit nuk arrika dot as deri tek mirëmbajtja e trotuareve. Në 4 vite duke parë vizione me tram, Luli ia doli t’u vështirësojë qytetarëve edhe ecjen në këmbë.
Detyra e një kryetari bashkie është ta bëjë qytetin të jetueshëm për banorët e tij. Të garantojë që qytetari është në qendër të çdo vendimmarrje e çdo pune. Të bëjë më të lehtë e më cilësore jetën e çdo banori të bashkisë që drejton.
Luli këto as i kupton, e as i interesojnë.
Por i kuptojnë qytetarët të cilët në 21 qershor do të mbyllin kapitullin e Lulit në Tiranë dhe do të votojnë për Erion Veliajn, kandidatin që do ta rikthejë kryeqytetin në drejtimin e duhur.”, mbyll deklaratën për shtyp Gaçi.
