Për deputetin socialist Ilir Beqaj ekonomia ka disa sfida përpara. Por personalisht, Beqaj tha se do të donte që PS të shikonte përtej vitit 2021.
“Ne po hyjmë në dekadën e ardhshme. Kongresi i janarit do të jetë programor dhe linjat kryesore do të shpalosen aty. Nëse unë do ta shikoja Shqipërinë e dekadës së ardhshme, do të bashkoja disa copa të mëdha” – tha Beqaj.
Deputeti i PS u shpreh se mendon që në dekadën e ardhshme Shqipëria ka tre sfida të mëdha.
“Për mua Shqipëria ka sfidë të madhe demografinë. Sepse po mplaket. Ka sfidë të madhe mjedisin. Dhe një moment të tretë marrëdhënia me botën dixhitale” – tha ai.
Beqaj ‘provokoi’ në studion e emisionit “Java në RTSH” duke u shprehur se shoqëria duhet të bëhet gati për t’u ballafaquar me disa tema të rëndësishme.
“Prostitucioni apo disa substanca të caktuara janë tema që shoqëria duhet të ballafaqohet hapur. Sepse duam apo nuk duam ne, çdokush prej nesh funksionon edhe në një botë virtuale. Pra janë çështje që nuk i shmangim dot dhe po bëhen esenciale” – tha deputeti ilir Beqaj në studion e emisionit “Java në RTSH”.
g.kosovari
