Elon Musk ka thënë se firma e tij e raketave SpaceX nuk mund të vazhdojë pafundësisht të paguajë për shërbimin e internetit Starlink të Ukrainës. Deklarata e tij vjen pas “grindjes” së tij të fundit me Kievin.
“SpaceX nuk po kërkon të rikuperojë shpenzimet e kaluara, por gjithashtu nuk mund të financojë sistemin ekzistues për një kohë të pacaktuar”, shkroi Musk të premten në Twitter, duke iu referuar kompanisë së tij hapësinore që prodhon sistemin Starlink.
Në shkurt, njeriu më i pasur në botë aktivizoi sistemin e internetit satelitor të kompanisë së tij në Ukrainë për të mbajtur ushtrinë dhe njerëzit e saj të lidhur online.
Por muajin e kaluar pronari i Tesla-s i kërkoi Pentagonit të financonte programin në vend të tij, sipas mediave amerikane.
Kohët e fundit ai provokoi zemërimin e Kievit duke i sugjeruar të lëshojnë territor ndaj Rusisë.
Starlink punon duke ofruar internet me brez të gjerë përmes një rrjeti satelitësh. Ajo ka rezultuar jetike për ushtrinë e Ukrainës teksa lufton për të rimarrë tokën ukrainase nga Rusia.
Ukraina i dha kredi Starlink këtë javë për ndihmën për rinisjen e infrastrukturës së saj në zonat kryesore pas më shumë se 100 sulmeve raketore ruse.
Por programi kushton 20 milion dollarë në muaj për tu mirëmbajtur, sipas Musk.
Ai së fundmi tha se SpaceX kishte shpenzuar 80 milionë dollarë deri më tani për ta mbajtur Ukrainën me internet.
“Përveç terminaleve, ne duhet të krijojmë, lëshojmë, mirëmbajmë dhe rimbushim satelitët dhe stacionet tokësore”, shkroi ai në Twitter.
“Ne gjithashtu na është dashur të mbrohemi kundër sulmeve kibernetike dhe bllokimit, të cilat po bëhen më të vështira”.
Zëvendëskryeministri i Ukrainës, Mykhailo Fedorov, minimizoi tensionet me Musk, duke shkruar në Twitter se miliarderi “është ndër donatorët më të mëdhenj privatë në botë që mbështesin Ukrainën”.
“Starlink është një element thelbësor i infrastrukturës sonë kritike,” shkroi ai.
Në fillim të këtij muaji, Musk postoi në Twitter një propozim që Ukraina të pranojë aneksimin e Krimesë nga Rusia dhe të lejojë referendume në rajonet ukrainase të pushtuara nga Moska./ BBC
/e.d
