Publikohet formulari A1 dhe A1Z, ku të gjithë maturantët duhet të listojnë dy lëndët që do të japin si provim me zgjedhje. Ata kanë mundësi të përzgjedhin mes 27 lëndëve, shkruan Gazeta Shqiptare. Ministria e Arsimit dhe Sportit ditën e djeshme ka publikuar edhe udhëzuesit përkatës për plotësimin e këtyre dy formularëve. Risi në formularin A1 dhe formularin A1Z është ndarja e lëndës “Teori profesionale” sipas 25 profileve përkatëse të shkollave. Formulari A1 plotësohet vetëm nga maturantët e vitit 2015-2016, ndërsa formulari A1Z plotësohet vetëm nga ata kandidatë që kanë mbaruar vitin shkollor para viti 2016. Aplikimi në portalin qeveritar ‘e-albania’ ka nisur dje më 15 mars dhe do të vijojë deri 30 mars 2016. Ndërsa aplikimi në portalin Matura Shtetërore 2016 do të kryhet në periudhën 25 mars-10 prill 2016, sipas kalendarit të publikuar nga AKP dhe vetëm në shkolla në praninë e mësuesve.

HAPAT E PLOTËSIMIT

Formularët A1 dhe A1Z plotësohet dy herë online, fillimisht në portalin qeveritar ‘e-albania’, ku plotësimi ka nisur dje dhe do të vijojë deri në datë 30 mars 2016. Në këtë portal maturantët e bëjnë vetë plotësimin, ku hapi parë është plotësimi i formularit A1/A1Z, ku ruhen të dhënat personale si dhe provimet të cilave do t’u nënshtrohet, ose mbarten notat në rast se ka dhënë një ose më shumë provime (kjo për ata që plotësojnë formularin A1). Më pas plotësimi i tyre bëhet në portalin e Maturës Shtetërore në periudhën 25- mars-10 prill, sipas një plani kalendar që pritet të publikohet nga AKP. Plotësimi i formularit A1Z bëhet në shkollat ekzistuese, ku kandidati ka bërë shkollën e mesme ose në shkollën ku e përcakton komisioni i Maturës Shtetërore. Procesi i plotësimit të formularit A1 dhe formularit A1Z nuk bëhet individualisht nga maturanti, por ndiqet nga një person i ngarkuar nga drejtoria e shkollës, që quhet “mbikëqyrës”.

Mbikëqyrësi pajiset me kodin përkatës të hyrjes në sistem. Vetëm pasi mbikëqyrësi fut kodin në sistem, maturanti mund të përfundojë plotësimin e formularit A1. Në pikat 1-6 maturanti në bashkëpunim me mbikëqyrësin duhet të futë të dhënat personale dhe disa të dhëna të shkollës. Ndërsa në pikën 7 të formularit A1, maturantët duhet të shënojnë edhe nëse do të aplikojnë për studime jashtë vendit. Disa pika të këtij formulari plotësohen vetëm nga mbikëqyrësi, nga 10-14, ku në pikën 14 shënohet gjuha e huaj që në planin mësimor të shkollës trajtohet si gjuhë e huaj e detyruar, në nivelin gjuhësor B1. Lista me të dhënat e marra nga plotësimi i formularëve printohet, nënshkruhet nga maturanti, mbikëqyrësi dhe vuloset nga drejtori i shkollës, ku plotësohen formularët A1.

KUSHTET

Në këtë formular jenë të listuara 27 lëndë që mund të zgjidhen nga maturantët e të gjitha shkollave. Por, për përzgjedhjen e dy lëndëve me zgjedhje janë përcaktuar disa kushte, ku një prej tyre është që shuma e krediteve të dy lëndëve që do të përzgjidhen nuk duhet të jetë më pak se tetë kredite. Maturanti ka të drejtë të zgjedhë vetëm një gjuhë të huaj, që në planin mësimor të shkollës së mesme të lartë, trajtohet si “gjuhë e huaj e parë”, pavarësisht nëse është zhvilluar apo jo në shkollë. Niveli gjuhësor i këtij testi do të jetë B2. Gjuhët që mund të përzgjedhin janë: Anglisht, Italisht Frëngjisht, Gjermanisht, Greqisht Turqisht dhe Spanjisht. Maturantët e shkollave artistike kanë të drejtë të zgjedhin vetëm njërën nga lëndët: Histori muzike, Histori arti dhe Histori baleti.

Për herë të parë, maturantët e shkollave profesionale lëndën “Teori profesionale” e kanë lëndë me zgjedhje të detyruar. Ndaj këtë vit në formularët A1 dhe A1Z kjo lëndë është e zbërthyer në 25 profile sipas indeksit të shkollave dhe ata e kanë të detyruar të zgjedhin në grupin e III lëndën sipas profilit që ata kanë. Ndërsa lëndën tjetër maturantët e shkollave profesionale duhet ta zgjedhin nga lëndët e grupi I, ku janë 27 lëndë që janë për të gjitha shkollat. Kandidati kur zgjedh një lëndë të thelluar, nuk mund ta zgjedhë edhe si lëndë bërthamë.