Spitali Rajonal i Durrësit ofron për të gjithë pacientët që kanë nevojë, proteza ortopedike falas.
Afro 18 pacientë, kanë përfituar, deri më tani, këtë shërbim pranë këtij spitali, ndërkohë që sipas mjekëve cilësia e materialeve është e njëjtë me atë që përdoret sot në vendet më të zhvilluara europiane.
Ministri i Shëndetësisë, Ilir Beqaj, ishte në spitalin Rajonal të Durrësit ku takoi njërin prej pacientëve që ka përfituar falas protezën ortopedike, ndërsa diskutoi me mjekët ortopedë dhe drejtuesit e spitalit për ecurinë e këtij procesi.
“Ky spital, këtë vit, ka një buxhet rreth 100 milionë lekë për protezat dhe është pjesë e paketës së madhe prej 1.8 miliardë lekësh që këtë vit do të shpenzohen për protezat në Tiranë dhe në disa spitale rajonale ku shërbimet e ortopedisë funksionojnë”, u shpreh Beqaj.
Kreu i Shëndetësisë, theksoi se materialet e reja që po përdoren janë një ndihmë e madhe, jo vetëm për pacientët, por edhe për vetë mjekët.
“Spitali i Durrësit ka një skuadër shumë të mirë me 5 ortopedë, të cilët janë në gjendje të bëjnë punë të mirë, dhe tashmë, me protezat që i kanë dhe me pjesën e instrumentave kirurgjikalë që do të fillojnë të shtohen, – besoj brenda verës, – mjekët do të mund të japin më të mirën, pacientët do të shërbehen shumë më mirë, por edhe besoj, marrëdhënia pacient-mjek do të jetë më transparente edhe më normale”, deklaroi Beqaj.
Ndërkohë, Dr. Neritan Myderrizi, Shef i Shërbimit të Ortopedisë në Spitalin Rajonal të Durrësit, shprehet se është hera e parë që në vendin tonë po përdoren proteza të një cilësie kaq të lartë.
“Për herë të parë janë futur proteza shumë cilësore, që janë proteza bipolare, bashkëkohore, proteza që vendosen pothuajse në gjithë spitalet moderne të Europës”, theksoi Dr. Myderrizi.
Nga ana e tij, mjeku ortoped pranë spitalit rajonal të Durrësit, Redi Hoti, nënvizoi se materialet ndihmojnë në riaftësimin e shpejtë të pacientëve ndërsa i gjithë ky shërbim ofrohet falas për të gjithë ata që kanë nevojë.
“Janë materiale ‘Titani’, dhe që nga Shtatori i 2016-ës, të gjithë pacientët me frakturë, janë trajtuar me impiantet prej ‘Titani’, falas. Dhe shërbimi, dhe impiantet, janë pjesë e shërbimit të trajtimit të frakturave falas. Kjo ka bërë të mundur që pacientët të trajtohen më mirë, me mënyra bashkëkohore, gjë që është e mirë edhe për shërim më të shpejtë të pacientit”, deklaroi mjeku Hoti. /b.d
