Në fakt organizatorët e Studentëve janë fare të dukshëm dhe duket se ajo “pa dituri” deri me sot për protestën e ka një burim. Kjo, lidhet me sa duket me forcat që nuk donin të privatizonin menjëherë energjinë e protestës.
Por, zhvillimet e ditës së shtunë po tregojnë një gjë tjetër. Basha dhe Kryemadhi duket se janë në një gjatësi vale, sa i përket të ardhmes së kësaj proteste. Madje, edhe pse kanë qenë në pika të ndryshme, Opozita duket e bashkuar dhe me një zë ndaj protestës së studentëve. Nga foltorja e Kuvendit të Demokratëve, kryetari Basha u shpreh se e vetmja mënyrë për të rrëzuar kryeministrin Rama, është bashkimi në protesta, por për të rrëzuar Edi Ramën nuk ka nevojë për dhunë, ndërsa shtoi se qeverinë mund ta rrëzosh nga pushteti duke i rezistuar atij përditë, duke protestuar për ditë!
Dhe, tashmë kuptohet mirë se kanalet që mbajnë tensionin me studentët janë mirëfilli politikë. Këtë e kupton nga ndarjet e frikshme të tyret, por edhe nga padituria e një pjese të madhe të studentëve se vërtetë cili i organizon. Më shumë akoma, nga mos negocimi me kryeministrin, që është ofruar të plotësojë tetë kërkesat dhe madje edhe më shumë sesa kërkojnë ata.
Dhe, filozofia e marrjes së protestës është përshkuar mirë te fjalët e sotme të Bashës: “ Edi Rama nuk rrëzohet nga pushteti duke e goditur një herë me top. Edi Rama rrëzohet: Duke i rezistuar atij përditë, Duke kundërshtuar përditë keqqeverisjen e tij, duke protestuar për ditë,duke ju bashkuar protestës së qytetarëve të Shkozës, duke ju bashkuar protestës së qytetarëve të Unazës, duke iu bashkuar protestës së qytetarëve për Teatrin, duke iu bashkuar protestës së qytetarëve të Kukësit, duke iu bashkuar protestës së qytetarëve të Himarës, duke iu bashkuar protestës së studentëve, duke iu bashkuar protestave të qytetarëve, biznesit të vogël, fermerëve, që po shpërthejnë çdo ditë nën shembullin e kurajos së studentëve, duke iu bashkuar çdo proteste, çdo ditë, kundër çdo padrejtësie. “ u shpreh Basha.
Gati të njëjtën gjë, në të njëjtën kohë, artikuloi kryetarja e LSI-së, Monika Kryemadhi, në takimin e strukturat e partisë në Durrës, duke kërkuar angazhim direkt ditën e hënë, por kuptohet pa flamujt politikë: “Të hënën të gjithë t’iu bashkoheni studentëve në Tiranë, pa flamuj partiakë, pa kartë anëtarësie, se ndryshe do të jenë shumë vonë për ta, për ne dhe për të gjithë Shqipërinë. Secili nga ju të këtë edhe dhjetë vetë me vete”.
A po u merret protesta studentëve? Me sa duket politikanët po penetrojnë me kujdes, falë edhe neglizhencës së Ramës për të parë realisht situatën, krijuar nga protesta. (Javanews)
