Partia Demokratike është fokusuar në dy objektiva kryesore, zgjedhja e kandidatëve për zgjedhjet lokale nëpërmjet primareve dhe protestat. Ndërsa i cilëson primaret si demokraci brenda partisë, anëtarja e kryesisë së PD zbuloi në Klan News dhe arsyen e shtyrjes së zhvillimit të protestave kundër qeverisë.
Jozefina Topalli: Drejtuesit e Partisë Demokratike kanë qenë shumë të kujdesshëm për disa arsye të tjera gjeopolitike që ata nuk i kanë shprehur publikisht por që janë themelore. Kjo është për tu vlerësuar, por si çdo opozitë ajo duhet të jetë serioze dhe është treguar shumë serioze, sigurisht duhet të ketë protesta.
Topalli tha se PD do të dojë vite që të rikuperojë dëmtimet që pësoi nga gabimet e ish-kryetarit Lulzim Basha, ndërsa tha se vota e deputetëve të grupit Alibeaj në Parlament për ligjin e hapjes së dosjeve tregoi bashkëpunimin e tyre me qeverinë.
Jozefina Topalli: Ishte testimi i një panorame të qartë të një bashkëpunimi, midis qeverisë të zotit Rama dhe të një grupi të reduktuar deputetësh.
Pas çështjes së financimeve ruse, Topalli thotë se Basha nuk ka më të ardhme në politikë
Jozefina Topalli: Dëmi ka qenë aq i madh, aq i rëndë, me një kosto shumë të madhe për vendin tonë. Pas çështjes së parave ruse është i vdekur politikisht.
Topalli tha se PD në bazë është e bashkuar dhe po punon për zgjedhjet lokale, ndërsa deputetët kundërshtarë i cilëson një pakicë qe e ka derën e hapur për bashkëpunim.
/e.d
