Eksperti i sigurisë dhe ish-zyrtari i Shërbimit Informativ Shtetëror, Xhevdet Zeka i ftuar në emisonin Dekalog nga Roland Qafoku në DritareTV ka folur për ndikimet e huaja në protestën që po zhvillohet në Tiranë. Sipas Zekës, është mëse normale që në lëvizje kaq masive dhe të rëndësishme, të ketë ndërhyrje nga shërbimet inteligjente të vendeve që kanë interesa strategjike jo gjithmonë mike me Shqipërinë.
Spiunazhet serbe, greke apo edhe të vendeve si Irani, kërkojnë vazhdimisht dobësimin e qeverive ose krijimin e kaosit në rajon.
Interesat greke, për shembull, rreth zhvillimeve në jug të vendit, apo frika e Serbisë nga rritja ekonomike e Shqipërisë në prag të anëtarësimit në Bashkimin Evropian, janë arsye të mjaftueshme për t’i mbajtur agjenturat aktive në terrenin shqiptar. Zeka thekson se prezenca e tyre nuk e komprometon kauzën e drejtë të popullit; problem i vërtetë, shtoi ai, nuk është ekzistenca e këtyre shërbimeve të huaja, por fakti se çfarë po bëjnë institucionet shqiptare të sigurisë, specifikisht SHISH dhe Ministria e Brendshme, për të parandaluar dhe identifikuar këto kërcënime.
