Kreu i grupit parlamentar të PD Edi Paloka ka qenë i pranishëm në Drejtorinë e Policisë së Tiranës për të protestuar kundër ndalimit të një sërë simpatizantësh të demokratëve, të arrestuar ditën e djeshme, gjatë protestave në Parkun e Liqenit. Deputeti tha se në ambientet e policisë ende vijon të konsumohet një padrejtësi e madhe, teksa shtoi se janë mbajtur nën arrest edhe persona të mitur, kundër cdo ligji.
“Unë jam këtu së bashku me familjarët e të shoqëruarve në polici, të cilët presin të marrin një përgjigje, jo nga kjo polici, që dje vërtetoi se është policia e krimit, por nga drejtësia…Përpara ligjit do duhej të ishin Edi Rama e Erion Veliaj, që urdhëruan dhunën e policisë.
Dua t’ju bëj me dije se ka edhe minorenë të cilët mbahen aty dhunshëm, në kundërshtim me ligjin. Ata që janë brenda janë në të drejtë të Zotit, dhe në të drejtë të ligjit.”- tha Paloka.
Fjalën gjithashtu e mori edhe Fatmir Hoxha, ish i përndjekur, të cilit i është arrestuar i biri. Fatmir Hoxha është pjesë gjithashtu e opozitës.
“Është nder që fëmijët tanë protestojnë për një të drejtë, për lirinë për demokracinë. Është nder të jesh antikomunist, por fatkeqësisht organet e policisë i janë rikthyer ish punonjësve të diktaturës. Atë që bënë të parët e tyre, atë po bëjnë edhe të bijtë e etërve të tyre. Sot në qeli ndodhen minoren. Ky(Rama) nuk është demokrat, por një drogmen. I bëj thirrje qytetarëve shqiptarë, se vendin e ka marrë një kryedrogamen, një kryemafioz.”- tha Hoxha.
