Spartak Ngjela thotë se Sali Berisha po bëhet gjithnjë e më agresiv në politikë, për shkak të dështimeve të njëpasnjëshme. Avokat Ngjela i ftuar në Intervistën e Ditës nga Ermal Peçi në Dritare TV, tha se me Berishën, PD nuk do të ekzistojë më si parti politike.
“Protesta ishte një dështim. Ku ishte mosbindja civile? Ky është një nocion abstrakt. Mosbindja civile është të shkelësh ligjin. Bindja civile në një demokraci është bindja ndaj ligjit. Ata që shkencën ligjin në protestë u proceduan, ata që e organizuan shkuan në shtëpi.
Sali Berisha këtë ka bërë gjithmonë ndaj ka dështuar. Dështimi i gjatë të bën më agresiv. Mendoj që nuk do të ketë më asnjë përkrahje. PD duhet të përgatitet për lidershipin, sepse zgjedhjet janë afër. Nuk mund të fitojë një kryeministër i djathtë në Shqipëri, i cili është non grata në Amerikë. Është pamundësi absolute.
Nuk ka bashkëpunëtorë të nivelit të lartë politikë. Janë të gjithë njerëz të shtypur politikisht. Dëgjojnë Berishën, dhe e përsërisin. Nëse ti nuk e kupton dështimin tënd shkon nga drama në tragjedi.”, u shpreh zoti Ngjela.
