Në protestën e ditës së 108-të para Kryeministrisë (15 shtator), aktivisti Arben Kola ka bërë thirrje për vijimin e protestave dhe rritjen e presionit publik ndaj qeverisë, duke kërkuar përshkallëzim dhe mbështetje, pasi këto javë pjesëmarrja ka qenë e ulët.
Gjatë fjalës së tij, Kola kërkoi arrestimin e zyrtarëve të lartë, duke iu drejtuar edhe Prokurorisë së Posaçme (SPAK) që të vijojë me hetimet dhe arrestimet.
Ai i bëri thirrje SPAK-ut të vijojë me arrestimet, duke e cilësuar këtë institucion si të rëndësishëm për atë që ai e konsideron çlirimin e vendit nga kapja e mafies.“I bëjmë thirrje SPAK-ut: vazhdo me arrestime. I vetmi institucion që bën të mundur çlirimin e Shqipërisë nga kapja e mafies antishqiptare, e udhëhequr nga Rama”, deklaroi aktivisti.
Kola ka bërë një thirrje për qytetarët për protestën e së enjtes, duke njoftuar se Parlamenti do të mblidhet në orën 10:00 për zhvillimin e seancës plenare.
Kola deklaroi se në këtë seancë do të kalohen me urgjencë pesë ligje, të cilat ai i cilësoi si “antishqiptare” dhe që, sipas tij, synojnë grabitjen e pasurive të shqiptarëve.
Aktivisti u bëri thirrje qytetarëve që të mblidhen para Parlamentit, duke e cilësuar atë si vendin ku të përballen me “kriminelët dhe tradhtarët”.
“Një njoftim i rëndësishëm, ditën e enjte, Parlamenti i Krimit rimblidhet sërish në orën 10:00, për të kaluar me urgjencë 5 ligje antishqiptare, që janë për grabitjen e shqiptarëve.
Prandaj, kush thotë që dua përshkallëzim, atje është sheshi, atje është mejdani, atje janë kriminelët, atje janë tradhtarët. Mos gjeni justifikime! Ditën e enjte, ora 10:00, të gjithë te Parlamenti i Krimit”, tha aktivisti.
Sipas rendit të ditës të njoftuar nga Kuvendi, deputetët do të zhvillojnë katër interpelanca urgjente me ministrat e Mjedisit, Punëve të Brendshme, Arsimit dhe Shëndetësisë, të kërkuara nga një grup deputetësh të Partisë Demokratike.
Në seancë do të realizohet edhe një interpelancë me Ministrin e Infrastrukturës dhe Energjisë, Enea Karakaçi, e kërkuar nga deputeti Blendi Himçi.
Në vijim, Kuvendi do të votojë disa projektligje, mes tyre ratifikimin e Konventës për Themelimin e Komisionit Ndërkombëtar të Kërkesave për Ukrainën dhe Konventën Kuadër të Këshillit të Evropës për Inteligjencën Artificiale, të Drejtat e Njeriut, Demokracinë dhe Shtetin e së Drejtës.
Në rendin e ditës janë përfshirë gjithashtu ndryshime në ligjin për statusin e gjyqtarëve dhe prokurorëve, projektligji për dizenjot dhe ndryshime në ligjin për marrjen në kontroll të shoqërive me ofertë publike.
