Deputetja e Partisë Socialiste, Milva Ekonomi, ka shprehur shqetësimin e saj për ndikimin e asaj që e cilësoi si “algoritëm politik” në demokracitë moderne, duke theksuar se rrjetet sociale po zbehin debatin publik dhe po krijojnë një realitet të ri politik.
E ftuar në emisionin “3D nga Albana Dudushi” në RTSH, Ekonomi deklaroi se fuqia që ka sot algoritmi politik qëndron në faktin se u jep njerëzve ndjesinë e pëlqyeshmërisë dhe pranimit pa bërë gjë, ndërsa njëkohësisht dobëson debatin përmbajtësor dhe diskutimin real publik.
“Fuqia që ka sot algoritmi politik është se njerëzve u jep të drejtën e pëlqyeshmërisë dhe mosdebatit, ndërkohë humbet debati përmbajtësor dhe real publik. Kjo gjë po ndodh në botë dhe rreziku i algoritmit politik është rreziku më i madh që ka demokracia sot. Ky algoritëm politik hyn në rrjetet sociale dhe njerëzve u krijon idenë se janë të dobishëm pa bërë asgjë dhe të pëlqyeshëm pa thënë asgjë, vetëm nga pëlqimet që marrin”, tha Ekonomi.
Sipas Ekonomit, algoritmi politik po shfaqet si një aktor i ri në jetën demokratike të shoqërive moderne, duke ndikuar drejtpërdrejt në mënyrën se si formohen opinionet dhe perceptimet publike, pa pasur një debat real.
“Ajo që po ndodh në rrjetet sociale lidhet edhe me sigurinë kibernetike të vendit. Ne patëm një sulm kibernetik dhe u ndihmuam nga ekspertë vendas dhe ndërkombëtarë që mbështetën vendin. Në algoritmin politik mungon debati real. Ne po presim nga protestuesit të kuptojmë se çfarë kërkojnë. Një pjesë e kërkesave u morën nga Partia Demokratike dhe u sollën në Kuvend dhe morën “neomalësoren” në shesh, këto janë deri tani suksesi i protestës”, u shpreh deputetja.
Ajo bëri dallimin mes ndikimit të algoritmeve politike dhe procesit të dixhitalizimit, duke vlerësuar se shumë qeveri në botë po investojnë në teknologji për përmirësimin e shërbimeve publike dhe jo për manipulimin e debatit politik.
“Bota tjetër është ajo e dixhitalizimit, ku po punojnë shumë shërbime ekzekutive në shumë shtete dhe ku shërbimet publike janë online. Bota përdor inovacionin për dixhitalizimin dhe jo algoritmin politik”, deklaroi ajo.
